厭倦了傳統的生日蛋糕？也厭倦了以可愛的卡通人物為主角的蛋糕？日本就有一間蛋糕店分享了一款「特別的生日蛋糕」。蛋糕店店長的朋友想為自己女友慶祝生日，又不想平平無奇，於是委託他製作了一款前所未有的「般若波羅蜜多心經」生日蛋糕，網民就爆笑問「係咪好想超渡自己女友？」

撰文：GW｜來源：Twitter @06atsushi14（原文刊於《新假期》）

呢一款咁有心嘅特製蛋糕市面上絕無僅有，就算有大家都唔一定敢買嚟送比人！據講呢個蛋糕仲用咗兩個鐘頭去製作，上面嘅經文仲係由蛋糕師傅一筆一劃咁慢慢寫上去（如果寫錯字咁咪大件事？），非常有心機。

大家見到呢個咁有創意嘅蛋糕之後，除咗好奇女友收到蛋糕後嘅反應，更多嘅係關心男友嘅生命安全，畢竟送「經文蛋糕」超渡女友呢件事非常高風險。

「般若波羅蜜多心經」生日蛋糕嘅相一公開，即刻就喺網路上瘋傳，吸引大批網民留言。網民仲留低咗不少有趣留言，「呢個蛋糕食完應該會有被超渡嘅感覺」、「他一直在玩命.jpg」、「到底係超渡女友，定係送完之後比女友超渡呢？等我地繼續睇落去！」、「蛋糕上面應該插蠟燭定係插三支香…？」、「呢位男友施主你仲在唔在生？」、「蛋糕師傅會唔會整整吓雙手合十跪地禱告呢？」。

各位網民都好期待事主嘅Update，不過至截稿為止都未有更新。唔知如果係大家收到呢個「般若波羅蜜多心經」蛋糕，你地有咩諗法，又會唔會想訂返個祝朋友生日快樂呢？