影紅葉技巧1. 焦點放在色彩飽和度
有冇試過肉眼睇嘅風景，同透過相機mon睇嘅顏色有出入？呢個時候就要注意「影像風格」喇！
雖然一機在手，但一直都只用auto模式，影唔到滿意靚相嘅話，可以由設定攝影模式嘅時候，調校「色彩對比」、「色彩濃度」，令紅葉嘅顏色更鮮艷突出。
影紅葉技巧2. 利用「白平衡」
覺得張相顏色太淡薄、色彩重疊嘅話，可以試下用「白平衡」調整色彩，有效改善影像嘅整體感覺。
調整「白平衡」時，配合晴天、陰天等天氣狀況更改，就可以簡單影出同auto模式完全唔同嘅感覺。
影紅葉技巧3. 留意天氣
想影出最鮮艷嘅紅葉，果然都係晴天下影最好。建議出發賞紅葉前，事先留意天氣狀況。如果唔好彩遇上陰天，可以嘗試調整影像風格，或調整「白平衡」，令照片展現出另一種style。
另一方面，自然太陽光係最容易影出鮮艷顏色嘅紅葉，而朝早同黃昏時段嘅光線，可以令紅葉嘅色彩更鮮明，更可以嘗試喺人流較少嘅朝早時分出門影靚相！
影紅葉技巧4. 配合背景改變曝光度
作為攝影新手，因為唔識調校曝光度而沿用auto模式影相嘅情況較多，但經常都唔係太光就係太黑，影到暈都未影到張滿意嘅相。呢個時候，可以配合背景更改曝光度！例如喺紅葉之下，並以天空作為背景，可以增加曝光度，咁就可以令本來顯暗嘅紅葉變得光亮。
另外，想影掉落地上嘅葉片時，使用auto模式嘅話，會配合昏暗地面調整，而令紅葉嘅顏色太鮮明。咁嘅情況下，可以調低曝光度，令紅葉嘅顏色更顯自然。
影紅葉技巧5. 影light-up推薦日落時影
日本唔少賞紅葉景點會於日落時分開始點燈，想影靚紅葉夜景嘅觀光客絕非少數。之但係，昏暗環境中點燈嘅紅葉，相比起日間時分光度較少，容易影得模糊。呢種情況雖然推薦使用腳架，但禁止使用腳架嘅觀光地點都有唔少⋯⋯
咁嘅情況下，就推薦喺天空尚未完全變暗嘅時分，亦即啱啱日落嘅時間去影。感度提高嘅話，即使係手持相機，都能影出靚嘅點燈紅葉景致！而且剛日落嘅時分人流較少，係隱藏嘅最住攝影時間！
影紅葉技巧6. 嘗試使用三腳架
如果用遠距鏡頭或大鏡頭，喺黑暗地方攝影時，總係容易因手震而令照片變模糊。利用三腳架就可以喺安定嘅狀態下影相，可以不倚賴感度而影到靚相。
觀光熱點嘅話，有機會限制唔畀帶腳架入場。呢個情況下，就建議搵扶手等，可以穩妥放置相機嘅地方，安放好部機再影。
影紅葉技巧7. 捕捉光線
不規限於紅葉，攝影時，巧妙地捕捉太陽光係一張相嘅關鍵之處！Close-up影紅葉嘅時候，以逆光狀態嚟影，可以影出葉片細微嘅變色情況，有漸層效果。
影全景相嘅話，可以用順光或斜光嚟影，呢個影法唔單止可以令紅葉嘅色彩更突出，亦可以同天空嘅清澄形成對比。配合自己想影嘅照片形象嚟尋找合適光源、角度，嘗試影出令自己滿意嘅作品。
影紅葉技巧8. 挑戰各種構圖
拍攝紅葉嘅時候，總會發現影親嘅相，張張都差唔多咁，角度、構圖都異常相似。為咗防止發生啲咁嘅事，白費咗難得嘅靚景，嘗試挑戰各種構圖，令相片更豐富！
煩惱用咩角度影嘅話，推薦好似由下向上仰望嘅角度嚟影。可以蹲下嘅話就蹲下，唔得嘅話，可以直接將鏡頭向上影，可以影出以藍天作為背景嘅紅葉群。呢種構圖唔會影到任何人，喺人多嘅景點拍攝嘅話，建議使用呢個影法。
影紅葉技巧9. 活用模糊功能
將背景模糊，又或將最前嘅葉片模糊掉，可以將最想影到嘅嗰片紅葉突出起來。可以透過調整對焦嚟活用模糊效果，令張相更有美感。
想好好利用模糊功能影相，就將自動對焦換做手動對焦，然後點擊畫面上想要對焦嘅地方，就可以凸顯出你想要嘅畫面部分。呢個方法連智能手機都能輕鬆影到，下次出門影相可以嘗試一下！
影紅葉技巧10. 用軟件做微調整
一張完美嘅靚相，除咗拍攝時嘅各種環境、技術條件之外，之後嘅相片編輯可以令相片更加靚！而且，連相機都無法捕捉得好嘅細節部分，可以透過軟件調整至自己滿意嘅模樣。
現時有唔少免費嘅手機apps可以執相，而且仲有唔少係免費下載使用。如果只係想放上Instagram、facebook等社交媒體上，絕對足夠有餘！
影紅葉有甚麼技巧？
到秋冬紅葉季節，親眼睇嘅時候，明明啲紅葉仲好鮮色、靚到仙境咁，但一攞起部相機，啲色就暗晒好冇feel？學識以下10個影紅葉技巧，就可以記錄低最靚嘅紅葉風景啦！
如何拍出呃like旅行照？
想擺脫「遊客照」，不再伸出老土的剪刀手拍照？以下8個簡單自然又不造作的拍照姿勢你都能駕馭！詳情請看