當結咗婚，唔單止代表你同另一半兩個人嘅生活合而為一，仲代表咗將兩個家庭嘅圈子合而為一。就算平時雙方家長幾和睦共處，去到新年都會面臨一個難題。到底年初一，應該去我屋企拜年，定係去老婆屋企拜年呢？為咗呢個問題，我同老婆鬧咗場大交。
跟足新年傳統，未拜年先鬧交
我：「年初一去我屋企，年初二去你屋企，ＯＫ？」
老婆：「唔得啊，年初一要去我屋企先，因為之後要去埋我嫲嫲屋企。」
我：「但……年初一傳統不嬲都係去男家嗰邊先啦！」
老婆：「咁我屋企人就唔重要啊！點解一定要遷就你？」
我：「唔係，但我要同屋企人交代嘛！第一年結婚就去唔到拜年……」
老婆：「我都要交代啦～」
結果，花盡九牛二虎之力，同老婆討論咗好耐，結論係……點解新年嘅傳統要咁專制、咁唔理人感受？
婚後要顧兩頭家，左右做人難
我老竇係傳統嘅人，年初一一定要我同老婆去拜年。我老竇個老竇都係傳統嘅人，年初一一定要有齊晒仔女同埋啲孫去搵佢拜年。所謂嘅拜年，係要坐足全日，食埋晚飯，唔能夠坐一陣拍拍屁股走人。我老竇十年前就已經講：「你阿爺年紀大，哄下佢開心囉～都唔會煩到你幾多年啦！」
講得啱嘅，所以我結婚前，每年新年都會去陪阿爺。但結咗婚，老婆嘅屋企都有一個年紀大嘅阿爺。年初一只得一日，我唔單止要應付父母要求，帶個老婆去同佢哋拜年，仲要應付我父親嘅父母要求……
不跟傳統，分開拜年都可以
同樣地，老婆雖然被稱為「女家」，但佢都有屬於自己嘅家庭，佢父親嗰邊都有一個「男家」。到底應該點樣分配？
「我諗到喇！」
「點啊？影分身啊？定係割開我兩邊啊？」聽老婆語氣，佢仲嬲緊。
「我哋不如去旅行避世，一齊做不孝子！」
「黐線咩！不如咁啦……」
「點？」
「我哋分開去拜年，食完晚飯，一齊去食糖水，其實都開心啫～」
