有人話做一班朋友嘅旅行搞手慘過食屎，亦有人話用珍貴假期陪父母參加大陸團慘過食兩嚿屎。不過計我話，最慘莫過於要去外國公幹，身邊嘅朋友同屋企人一聽到呢個消息，立即為你準備一份手信清單，幫親戚買手信。
世界有99%父母 會命令仔女幫親戚買手信
同你講：「反正你去到都冇太多時間玩，不如幫我買啲手信啦！」
我發現呢個世界有99%父母，都覺得子女出國的最大目的，係幫所有親戚買手信。
每次去旅行，我阿媽都會準備手信清單，寫滿晒邊個親戚需要買咩，三叔想食日本蜜瓜，四姨婆又想食士多啤梨……
喂大佬！雖然我的確係去日本開完會，再出席一個晚宴活動，就即晚返香港。我係冇時間四周圍玩，但唔代表我冇時間休息吖！
拒絕會被怪責：做「少少嘢」都唔肯！
除此之外，父母會誤會全地球國家都好似香港咁細，搭幾個站就買到想買嘅手信。
當然啦！親戚會讚你乖仔，但一定唔會畀番錢你。佢哋見到街市賣假嘅日本水果以為好平，但日本其實賣好貴……
如果你拒絕，父母就會話你不孝，做「少少嘢」都唔肯。你買得貴想收番錢，佢又會用７５９阿信屋或街市價錢話你被人呃。
另類特色手信 「慰勞」一眾親戚
其實親戚想要特色手信都唔難解決，就好似去大阪，可以考慮買啲奈良餵鹿用嘅「仙貝」，同佢講係大阪特色零食。又或者可以考慮帶幾包一蘭食拉麵嘅鹽，送畀姨婆煮餸。
再唔係可以去酒店帶啲綠茶茶包返嚟，不過記住將茶包剪開，將裡面嘅茶葉倒出嚟，再用草紙包靚佢，同親戚講係日本最高級嘅茶餅。
買與不買，從來都係自由意志。買畀公司同事，係慰勞你放假時一班同事出手協助，幫朋友買手信冇計，買手信畀父母係孝子表現，希望老人家開心，但真係諗唔明，點解要買手信畀親戚呢？
所以，我今次公幹，決定將飛機餐嘅小小生果盒打包，特地問空姐攞多幾份，送畀班親愛嘅親戚，希望佢哋可以好好品嘗。
