【室內晾衫】落雨晾衫6大秘訣！日本專家教你正確洗衣、晾衫技巧
室內晾衫6大注意事項
1. 洗衣機種類
2. 放入衣物的正確順序
3. 洗衣劑選擇技巧
4. 學習使用洗衣機不同清洗程序
5. 洗不同衣服有不同洗法
6. 室內晾衫如何避免一陣「噏」味
1. 洗衣機種類
洗衣機分有2大種類，佢哋喺機身大小同打開方向唔同之外，其實功能亦有小小分別㗎！
前置式洗衣機
前置式洗衣機喺水嘅使用量上較上置式少，雖然可以慳水，但可能會有污跡殘留。
乾衣功能方面，前置式洗衣機會將衣物拋起攪動，令空氣得以穿透，將水分吹乾。
上置式洗衣機
上置式洗衣機用大量嘅水將衣物互相摩擦，從而令污跡掉落，去污力比前置式好。乾衣功能方便，衣物會纏埋一齊，令空氣難以穿透，乾衣力比前置式遜色。
著重乾衣功能嘅，推薦使用前置式洗衣機，而著重去污功能嘅，則上置式洗衣機較為推薦！
回到目錄
–
2. 放入衣物的正確順序
首先要將洗得嘅，同唔洗得嘅衣物分開！專家話，雨褸同泳衣係唔可以放入洗衣機洗㗎！雨褸有防水加工，若用洗衣機嘅強力水流清洗，可能會令呢層加工剝落，所以用手洗就夠。
而泳衣則可能有鹽素或海水成分殘留，呢啲物質有機會對其他衣物造成損害，所以同樣用手洗就夠。
將衣物分開後，就要決定放入洗衣機嘅順序，要適當清潔嘅話，原來唔可以亂咁放入洗衣機㗎！
洗衣專家教路，要先放入大件嘅衣物。咁係因為，以上置式洗衣機為例，洗衣機底部嘅波輪透過轉動製作水流波動，洗走衣物污跡，將大件衣物放到最底，令重心向下，可以有助提升洗衣機轉動效率。
放入大件衣物後，就放入有明顯污跡嘅衣物。若將污跡嚴重嘅衣物放到表層，有機會令污跡轉移到下層衣物上！因此須盡早放入洗衣機！而且，事前喺污跡上塗上洗衣劑先再洗，去污效果會更好。
然後中層可放入短裙、褲、T恤等等，最後表層就放入襪、內衣褲、毛公仔等等。為咗防止衣物變形，將冷衫、襪、內衣褲、帽等衣物用洗衣袋裝好再清洗最好！
回到目錄
–
3. 洗衣劑選擇技巧
家庭用洗劑約分為3大種類，分別為洗衣液、洗衣粉、柔軟洗衣液。但3種洗劑其實係針對唔同用途㗎！
洗衣液
容易溶於水中，大部分衣物都適用。亦有只需注水1次就可以清洗衣物嘅洗衣劑，可縮短洗衫時間！
洗衣粉
洗衣粉係3種洗衣劑裡面去污力最強嘅一種，但同時亦較難溶於水中，因此，需充分嘅注水先可以將洗衣粉完全溶解，需時較長。
而大部分洗衣粉都加入咗漂白劑成分，能夠將形成臭味嘅元兇・雜菌清除，防止「噏」味嘅出現！適合潮濕天氣使用。
柔軟洗衣液
去污力較低，但能夠喺清洗時防止衣物褪色或變形，對於質料纖細或冷衫毛衣等素材，以及重要嘅衣物嚟講，最為合適。
回到目錄
–
4. 學習使用洗衣機不同清洗程序
如果用開日式洗衣機，會發現佢哋有好多唔同清洗程序選擇，經常都搞唔明「標準」程序以外嘅其他選擇，其實即係點嘅呢？
一般「標準」程序嘅步驟係：一、清洗1次。用洗衣劑同水清洗；二、注水2次。用新水將污跡同洗劑洗去；三、脫水2次。去除衣物水分。
急住清洗用咩程序？
污跡若然係新整嘅，趁住未完全滲透到衣物纖維中，可用洗衣液+「快速」程序清洗。「快速」程序嘅注水同脫水次數只有1次，比「標準」程序慳時間。但若然比較重視去污嘅，可用洗衣粉+「標準」程序清洗。
回到目錄
–
5. 洗不同衣服有不同洗法
好鍾意嘅one-piece連身裙又應該點洗？
呢個情況可用柔軟洗衣液+「輕柔」程序清洗。「輕柔」程序比「標準」程序嘅水流弱，脫水時間亦較短，適合材質纖細或需小心處理嘅衣物。
但如果用洗衣粉洗衫，而揀咗「輕柔」程序嘅話，會因為洗衣粉無法完全溶解，導致衣物受到損害！
另外亦有「浸洗」程序選擇，呢個程序就適合清洗污跡較嚴重嘅衣物，但所需時間就比較長。
夏季用毛氈嘅洗法係點呢？
針對夏季用毛氈嘅汗味，正確嘅清洗方法係用有殺菌效果嘅洗衣粉+「毛氈」程序，呢個程序所使用嘅水量比「標準」程序多，脫水時間亦比較長，對於毛氈或其他尺寸較大嘅衣物而言，係最適合嘅程序。
回到目錄
–
6. 室內晾衫如何避免一陣「噏」味
潮濕雨季要喺室內晾衫時，大部分人都會選擇喺窗邊晾，諗住可以有些少陽光幫助乾衣。但洗衣專家就話，雨季時期窗邊濕氣較多，衣物難以晾乾，係造成衣物「噏」味嘅原由！
另一方面，即使勾喺窗簾上，亦有機會令窗簾嘅雜菌黏附在衣物上，同樣造成「噏」味！
廚房附近都一樣，唔止濕氣多，仲有機會喺煮食時，令烹調味道轉移到衣物上。
而喺冷氣機底下晾衫，雖然好似比較通風，但若果冷氣機本身較為污糟，反而會增加咗雜菌嘅滋生。
據專家所講，室內晾衫嘅最佳地點係距離門口近，又能被冷氣機嘅風吹到，屋嘅正中位置就最適合！因為既能吹到風，亦能避開牆壁、窗等濕氣較多嘅地方，再用埋風扇，就更能加快乾衣速度。
晾衣物時，擺放位置都有技巧！
將長身衣物放於外側，短身衣物放於內側。
第1個理由係，長身衣物能充分地被風吹到。
第2個理由則係喺中間部分營造出空間，令空氣流動情況更佳，可有效縮短30分鐘乾衣時間！大家記住喇！
回到目錄
–
