港男呻女婿身份淪為ATM 網上激起男女罵戰：當男仔係水魚
事緣近日有港男在網上以「點解做女婿食飯一定要畀錢」為題，開文大呻自己「唔鋸」的經歷。他指每逢跟老婆家人外出吃飯，一行五人每次結帳最少都過千元，但大家都「大安旨意」事主一人付清，從來也沒有想過夾份畀錢，更離譜的是有時候外母更會邀請「三唔識七」的人一起吃飯，當對方自動請纓結帳時，外母竟然「衝出嚟爭」，更道：「使乜你埋單啊」，暗指事主會結帳付款，令他極度不滿，因每次過千元的帳單其實也相當「重皮」。
網民得悉後，紛紛叫港男向老婆「Claim錢」，或叫老婆向家人反映，否則以後不出席任何飯聚；亦有網民力撐女婿付款天公地道，若這些「細數」也要斤斤計較，未免太過份！當中更有女網民表示不同意港男作為女婿的說法，更指其實歸根究底都是事主「無錢」，指「你無錢就唔好做人女婿，害人個女」，其後更引發男女大戰。
網民：父母覺得你錫唔錫個女就係睇呢啲位
女網民：父母平日難以得知自己女兒在外生活如何，往往都是從這些小細節留意，若果女婿連一餐飯都畀唔起，又可能會諗平時個女喺屋企係咪都係捉襟見肘咁。至於外母帶了外人來吃飯然後阻止對方付款，正正就係捍衛自己面子問題，「想令人覺得自己個女嫁咗個畀得起錢嘅男人，睇落都威啲啦嫁得好」。
男網民：難道女婿自己沒有父母？「男人啊爸啊媽見到自己個仔畀人當水魚咁撳，次次食飯都自己一個埋單，仲要請三五識七嘅人，張單個銀碼仲要唔少喎，佢哋都會覺得個老婆唔錫個仔啦，為自己面子而要女婿埋單係苛索行為，你哋呢啲港女咪就係助長風氣嘅人，自私外父外母就理所當然啦咩都」。
女網民勸事主「做返個男人啦。」
女網民指「雖然我認同你老婆有責任向娘家反映問題，亦應該自動自覺與你分一半帳單，但你有外父外母同叔仔應該畀返自己個份嘅諗法真係好肉酸，就算你話我係港女都係咁講，最多你咪食少幾餐或者上你屋企叫你老婆煮」。其後更指事主「又要面，又驚老婆，又要計較」，勸事主「做返個男人啦。」
男網民則指為何總是提出問題的人才被認為是問題製造者，「做錯事」的人則可繼續大安旨意？更指「佢個仔唔係無做嘢，點解唔可以有一次係佢請返我轉頭」。外父外母辛苦養大女兒確實可以「我請」，但他們兒子「關我咩事」？
網民教路一招兩全其美
另有女網民指，歸根究底都是事主「搵錢能力低」，若果薪金水平高的人根本沒有這問題出現，一千幾百一定「畀得起有餘」，勸事主還是努力賺錢養老婆。不過事主更不憤，指自己月入3.9萬元，當中會給2萬元老婆當作家用，平日外出吃飯購物消費都依然是事主負責，意指老婆「淨袋」兩萬元，已經對老婆相當不俗。而其他網民對於女網民指「多一倍人工就唔會咁講」的說法更抱不平，指「多一倍人工唔代表會多咗錢使，到時供樓又貴一倍，供車又貴一倍，薪金永遠追不上通脹。加上為何港女永遠把支出當作老公的責任，自己大條道理要「被照顧」？
不過最後亦有網民提出實際建議，指事主要不就跟老婆反映，下次吃飯時叫老婆結帳，若外父外母問到，只需說「所有錢都畀晒老婆，我自己身上得食Lunch嘅錢㗎咋，佢幫我管晒」，這樣外父外母若然真心疼愛女兒就自動「識做」，場面又不會尷尬。萬一情況未有改善，最多以工作忙碌為由拒絕出席，這樣便最無傷大雅，對方或會以為你努力工作養家，變相更欣賞你。
