01 | 黑寡婦爆笑新作！閨密尋歡玩出禍！《姐妹欲蒲團》
Scarlett Johansson最爆笑狂野嘅一次！一班好姊妹想蒲得豪放，玩得癲狂，搵埋脫衣舞男一齊尋歡，點知搞出人命兼連場笑話⋯⋯絲打們今次點收科？
02 | 單身無懼怕！（How To Be Single） 《單身又如何》
剩係見個戲名都知單身的朋友們要睇啦！戲入面狄高達莊遜（Dakota Johnson）飾演嘅女主角啱啱失戀，而莉寶韋遜（Rebel Wilson）飾演嘅好閨密，就見到睇唔過眼，用盡一切方法，教女主角點蒲、點識男仔，仲有點玩一夜情。其實單身好自由，都可以好享受！套戲仲要揀正情人節上映，仲唔快啲約埋一班閨密去睇！
03 | 男人婆變撒嬌女王！《撒嬌女人最好命》
閨密最眼火爆嘅事，莫過於好姊妹嘅男人被人搶走！張慧（周迅飾）同青梅竹馬嘅恭志強（黃曉明飾）明明曖昧，但就一直都「友達以上，戀人未滿」，在來自台灣的蓓蓓（隋棠飾）嘅撒嬌攻勢下，成功攻陷恭志強。幸好，在閨密－號稱上海撒嬌女王嘅阮美（謝依霖飾）和一眾撒嬌女團幫手，從言行舉止到打扮，將張慧由男人婆，改造成為撒嬌女王，就連一句「討厭～」都有學問，誓要為姊妹搶回男人！其實，做自己才是最重要，不要因為想得到一個人的認同而刻意改變自己喔！
04 | 正印與小三成好友！（The Other Woman） 《小三大聯盟》
小三同正印可唔可以做朋友？現實出現的機會率接近零，但電影就有機會啦！呢套電影完美演繹小三與正印都可以做閨密。三個女人愛上同一個男人，但佢哋發現男人仲有第四、第五者，最後佢哋決定聯手玩殘個男人！「正印老婆、律師小三、大胸小四」，加埋一定玩殘佢！
05 | 單身也不要緊，因為我們還有《閨蜜》！
閨密必睇嘅電影，梗係《閨蜜》啦！三個一齊讀書到出社會都friend過打band嘅好姊妹，性格雖然唔同，但close到不得了。不過閨密唔多唔少都要有啲考驗，先算係好閨密，希汶（陳意涵 飾）未婚夫出軌結唔成婚，Kimmy（薛凱琪 飾）和小美（楊子姍 飾）又因為一個男人嗌大交，究竟是姊妹情深定有異性沒人性？睇完你就知！
06 | 姊妹電影馬拉松！《小時代》1-4集
同樣是一齊讀書到出社會又都係friend過打band嘅好姊妹，自稱「時代姊妹花」的四位主角，在上海這個大城市，遇上社會考驗之餘，姊妹們的感情都受到影響。經過一連串嘅秘密揭露和情傷，仲可唔可以好似電影一開始咁「時代姊妹花，永遠不分家」？《小時代》一連四集，由小說翻拍成為電影，場景、戲服、演員，所有畫面都拍得好唯美華麗，對白仲好文謅謅。睇完，筆者除了感受到姊妹間的溫馨與猜忌，仲學到唔少小說描寫手法呢。
07 | 閨密當伴娘！（Bridesmaids） 《最爆伴娘團》
眼見你快做新娘，做密友的真想撒嬌～結婚係女人人生最大嘅事，做閨密嘅梗係要準備做姊妹，最friend嗰個仲要做埋伴娘。但伴娘要做嘅嘢多到一頁紙都寫唔晒，普通人都搞唔掂，女主角仲要係典型人生失敗者，不過一班好姊妹一齊搞，一定搞得掂！
8. 人生大事誰會讓步？《新娘大作戰》（Bride Wars ）
由細到大都係好姊妹，做咩都要一齊，但結婚就一定唔好喺埋一齊啦！戲入面麗芙與艾瑪，兩個嘅夢想都係喺紐約廣場大飯店（Plaza Hotel）舉行一場夢想中的世紀婚禮，並約定作對方的伴娘。但點知陰差陽錯，兩個嘅婚禮定喺同一日，其中一個人必須改期，兩個因為咁而大打出手！不過一場姊妹唔會鬥一世嘅！
09 | 女人的三個階段！《20 30 40》
20、30同40歲係女人必經嘅三大關口，三個階段面對唔同嘅經歷，張艾嘉、劉若英仲有李心潔分別演繹20、30同40歲嘅女人，不同嘅感情故事。大家睇完呢部電影，當你面對20、30、40嘅轉折點時，可能會有特別嘅想法。年輕的總會想突破界線，作好多的嘗試；到了30，女人有了點經歷，但亦因為多了經歷，便會多了顧慮而影響自己前進；到了40，過慣美好生活的，可能會想從後生的人身上，找回自己年輕的因子，告訴人不落後，也可以怡然自得。
10 | 經典閨密劇集！（Sex And The City ）《色慾都市》
閨密經典中嘅經典，《Sex And The City》可以話係表表者。成個故事都圍繞住紐約市四個女人嘅故事，有寫love & sex專欄的作家、有成熟同時對性開放的公關主管、有修養同時傳統保守的藝術品鑑賞家，以及有學識的單親媽媽律師。故事大多環繞浪漫同情慾嘅話題，同時都可以留意她們的華麗時裝。如果覺得電視劇太長，可以睇《慾望都市：電影版》，睇下劇集最終集結束的四年後有咩事發生，睇完就會知50歲都存在嘅閨密有幾難得！
情人節仍是單身的姊妹們，當然會想有個伴侶陪伴着。不過，人生中，有時候，情人熱烈的擁抱遠遠比不上朋友的一個會心微笑。除了家人、情人，擁有真心閨密是難能可貴之事。所以，當你遇上生命中你認為是你的閨密，要珍惜喔！
