浸大女學生屋企通宵溫書被鄰居投訴 寫匿名信斥行為騷擾：你製造緊光污染！
公屋話題不斷，除了「小強屋」外，「惡頂鄰居」都是一大考驗。最近有名浸大女學生於網上討論區大呻指「一搬入公屋就畀人投訴我開燈溫書」，事源女事主近日終於可入伙公屋，但由於撞正考試時期，早上要執屋，深夜時分才有時間溫書。有天突然在信箱收到一張匿名紙張，起初以為「被追數」，但該張用「Marker寫嘅大報」內容竟是投訴女生每天半夜開燈溫書，燈光騷擾到鄰居，並指她在製造「光污染」。
女學生：唔講以為住緊私樓或者豪宅
不過最奇怪的是，事主指屋企距離鄰居單位「感覺上有超過4個人嘅高度，關禮傑都飛唔到過去，又唔係對到正，我開燈溫書最多係斜對面單位見到，咁遠點樣騷擾？」，其後更指「我又無夜媽媽唱K嘈住人，靜靜地喺自己屋企溫書都唔畀？唔知仲以為住緊私樓或者豪宅」。
奉勸鄰居行事光明正大：我真係寧願你撳鐘話我溫書唔啱！
另外，女事主指由於搬屋的時間很趕急，未有時間安裝窗簾，暫時只用布作遮擋，但由於布料有「漏位」，所以有部分光會透出去，但「喺自己屋企開燈有光有咩出奇，咁都要畀人話？」。她又指對方做法鬼祟，「我寧願你光名正大撳鐘同我講，話我夜晚溫書搞到佢哋，instead of走去寫匿名信掉去我信箱」。
網民：私樓同豪宅先唔會有投訴
網民「教精」女事主，指「其實呢啲投訴喺私樓同豪宅都唔會點出現，呢啲咁細嘅麻煩只會出現喺你住嘅地方」，其他人則為女學生抱不平，表示「溫書都要畀人話，無天理」、「佢係咪知你讀大學，佢屋企嗰啲讀唔到所以妒忌你」、「下次唔溫書都拎塊鏡反射下佢，可能佢會話你照鏡都騷擾到佢」；亦有網民指不必理會，因屋邨管理扣分制度中沒有列明「半夜開燈」違規，對方要避開光源應自行掛上窗簾，無理程度爆燈。大家更建議女事主「報上東張西望幫佢出吓名」。
