【柑桔汁減肥法】最近韓國興起咗一陣柑桔減肥嘅風氣，連明星都用佢嚟溝酒飲減肥！有個韓國YouTuber 用咗兩個禮拜，跟住3條rules 做，14日就減咗8kg！
撰文：Tana｜圖片來源：網上截圖、Viu截圖、新傳媒圖片庫｜影片來源：MBC
韓國減肥YouTuber「 Josh & Bamui」
「 Josh & Bamui」係近期於韓國好紅、一個教人減肥嘅 YouTube channel。佢哋會用K-pop同歐美嘅歌曲，再配合舞蹈，推出一系列《只要堅持每日跳一首，兩個禮拜就可以減到10kg》嘅影片。
Bamui親自試柑桔汁減肥法
Bamui 因為前排每晚都飲啤酒、食宵夜、食甜品，搞到3個星期就肥咗5kg。當佢見到自己體重嘅時候，嚇咗一大跳，即刻開始咗柑桔汁減肥法，每日堅守住3條rules，用三星期增咗嘅肥，用兩個星期連本帶利咁減番晒！
柑桔汁減肥法第一條：中午照常食，晚餐輕食
冇錯，唔使跟足餐單，晏晝可以自由配搭揀自己鍾意食嘅，而 Bamui 就揀咗每晚食沙律做晚餐。
柑桔汁減肥法第二條：每日做兩個鐘運動
Bamui 除咗跳佢哋自己出嘅 《兩個星期瘦10kg》系列外，仲會跳韓國女團嘅舞，每日堅持跳兩個鐘！
柑桔汁減肥法第三條：每日兩杯柑桔汁及靈活利用柑桔汁整嘢食
終於到主角出場！柑桔每100g 先有30卡路里。而且柑桔入面有豐富嘅纖維質，落到肚嘅時候，會吸水膨脹、體積變大，令胃部有已經飽肚嘅感覺，減低食慾。最重要係可以抑制體內脂肪形成！但如果腸胃比較弱嘅話，就要小心啲，因為柑桔入面嘅酸性比較強，最好溝水飲！
連韓國女團Mamamoo 開Party都飲！
飲酒係韓國人社交活動好重要嘅一部分，但酒又好容易令人肥喎！唔緊要，睇韓國女團身材都知，佢哋keep fit 有一手，個個都擁有纖腰長腿。喺韓國電視台MBC節目《我獨自生活》中，Mamamoo嘅華莎邀請咗成員去佢屋企開party嘅時候，將柑桔汁加人燒酒入面，除咗可以減肥，仲話會冇咁易醉添！
華莎仲話溝燒酒飲嘅話，第二日連宿醉嘅感覺都冇！
