撰文：Carmen｜圖片來源：《名医が認めた！病気や体の不調を予防改善してくれる最強の食べ物SP》
日本近6成人受肩頸僵硬困擾
肩頸僵硬唔止係中年、老年人士常見嘅毛病，成日長時間保持同一個動作打電腦嘅，一眾辦公室打工仔都容易患上！肩膊一帶嘅肌肉稱為「僧帽筋」，係支撐頭部、頸嘅肌肉。
因為要支撐個頭，兩邊「僧帽筋」合共要負重10kg！係日常用得「最狠」嘅身體肌肉。而肩頸僵硬嘅原因，係疲勞積聚，令「僧帽筋」嘅血流滯住，血液循環唔好，就會令肌肉僵硬。
節目分別邀請咗3組不同年齡層嘅男女做實驗，用專門測量肌肉硬度嘅儀器，量度測試對象喺食用牛油果嘅前後，肌肉硬度數值變化。10～29為「安心區」、30～39為「提高警覺區」、40或以上就係「硬到爆區」。
上層顯示嘅數值為食用牛油果前嘅數值，近乎所有數值都處於「硬到爆區」！但只係食用咗牛油果10日，全員嘅肩頸肌肉硬度就回落到「提高警覺區」，甚至回落到「安心區」！
喺未食牛油果前，數值最高嘅福田小姐嘅右肩已經硬到舉唔高手！
但只係跟食譜食咗10日，就能輕鬆舉起右手！連節目嘅現場嘉賓都驚喜不已！
牛油果營養價值
牛油果含有豐富維他命B1、B2、維他命E，有令肌肉疲勞回復嘅效果。
另外，牛油果中亦含有油酸，對於預防動脈硬化、生活習慣嘅病痛非常有效。
10日見效咪要食好多？醫生就話，其實一日食半個已經好足夠！呢個分量好easy啫！
牛油果健康食譜
1｜燒紫菜涼拌牛油果
日本管理營養師・渥美真由美指出，燒紫菜中含有豐富維他命B1、B2，有令肌肉疲勞回復嘅效果，配合牛油果一齊食，能夠發揮到更好功效！
所需材料：大牛油果1個（去皮、去核，淨重200g）、支裝日式芥末（半茶匙）、醋（1茶匙）、豉油（2茶匙）、欖橄油（1湯匙）、燒紫菜（半片）。
做法：先將牛油果切粒備用，再將所有調味料放到碗中拌勻，然後將牛油果粒倒入調味汁，最後將紫菜撕碎放埋入碗，一次過將整體拌勻就完成了！
2｜照燒汁煮牛油果豬肉卷
豬肉同樣擁有疲勞回復效果，而且喺咁多肉類當中，豬肉係含有最多維他命B1、B2。
所需材料：牛油果（1個）、豬肉片（10片）、鹽+胡椒粉（各少許）、橄欖油（1湯匙）、豉油（1湯匙）、味醂（2湯匙）、檸檬油（1茶匙）。
做法：牛油果去皮、去核後，縱向切至5等片，然後用豬肉捲住牛油果片，用鹽＆胡椒粉調味。將橄欖油加到鑊中，調至中火烹煮牛油果豬肉卷。兩邊都煎至轉色後，就加入豉油、味醂、檸檬汁打芡，煮稠芡汁就完成。
