黎青龍減薪仍願贊助
「蝦皮」鄭業楷在《Pokémon GO》世界賽中勇奪冠軍，為香港再添世一。Pokémon GO香港隊前領隊張樂行今早在社交平台分享，自己去年寫信予同為Pokémon GO愛好者、港大醫學院內科及肝臟科講座教授黎青龍，邀請對方為團隊成員贊助旅費。當時黎青龍表示正值減薪，收入減少，故只能贊助一萬元。「我無諗過教授會畀咁大筆錢支持我哋呢班佢三唔識七嘅人。我不停講多謝。」後來知道，黎教授要減薪才可繼續以榮休教授的身份工作，否則要強制退休。
張樂行又說，黎青龍當時表示不擅長用電子支付，只能下班後到銀行轉帳。「我以為佢話『跑』係講笑。點知，如果我無記錯時間，佢大約17:03就過咗數。佢應該真係跑去銀行，而且跑得好快。」回憶當時的處境，張樂行形容：「我係日日搵贊助都被人鬧、被人笑、被人無視，更甚者，是遭奚落及侮辱：「你憑什麼要我贊助，咁你攞左世界冠軍未？」。只有黎教授同另一位郭大維老闆向我哋投下信任一票。雪中送炭，我呢世都會記住。」
雖然香港團隊在日本的賽事於小組止步，但黎青龍未有怪責，還鼓勵他們：「輸咗唔係咁大件事。繼續打，一定會考第一嘅！」還表示希望香港隊將來會贏。賽後香港隊隊員為表謝意，在會場限定精品店「瘋狂咁掃咗成車禮物」予黎青龍，其中有隊員堅持自費購買的特別版「拉麵比卡超」。
前領隊：個冠軍黎青龍教授係有份
至今年，由於有官方贊助「蝦皮」的機票及酒店，故沒有再找黎青龍贊助，張樂行坦言，擔心對方覺得香港隊是「伸手黨」、「年年走去呃佢錢嘅騙子」。不過，他每日也有跟黎青龍報告比賽戰況，對方也一直為團隊加油。到奪得世一後，黎青龍更「派咗好多個心心」予團隊。
他又提到，後來在一電台節目，得知黎青龍說今屆團隊無找他贊助有些失望，自言「原來我一直以小人之心，度君子之腹，我驚黎教授會嫌棄我哋問佢攞錢。點知教授一直想搵個機會，還一個佢唔需要還嘅人情畀我哋。」
他在文末也再度向黎青龍表達謝意，指對方有份成就今屆的「世一」，「喺我心目中，個冠軍黎教授係有份嘅。無咗佢舊年嘅栽培，畀我哋出去見識世面，唔會有今日嘅蝦皮。」
