港女搭足全程港鐵 中途竟被迫讓座
早前，一位港女在討論區分享惡頂經歷，表示近日因為要在港鐵上由起點坐到終點，因而上車後見到有空位便坐下休息。豈料當列車行駛至中間站時，突然有一對母女上車並毅然站在事主面前，女童先主動開口問母親：「點解啲人（乘客）唔讓座畀小朋友？」，遂與母親以唱雙簧形式向事主施壓，令其十分不滿。
女童為迫讓座與母扯貓尾 1句即時激嬲事主
當女童問完母親後，對方就以帶有諷刺意味地語氣回答指：「係囉，點解啲人唔讓座畀小朋友，都唔係老人家」，又突然問女童：「學校老師有冇教要讓座畀小朋友」，奇怪的問答不禁令事主懷疑對方存心「畀說話我聽」。她表示當刻其實想「爆粗指罵」對方，但又怕「教壞小朋友」，最後只好吞聲忍氣作罷。
事主用錄音表達不滿 網民狠批無家教
事主當時未有勇氣即場指罵，但她選擇用「錄音」來對付她們。事主在這對母女面前錄音發給朋友，稱車上有人強迫讓座，「佢鍾意比說話人聽，我咪同佢一樣比翻說話佢聽 早知再講大聲啲比全車人聽到」， 未有提及自己有否讓座給二人。
事主堅持不讓座 全程目擊母女搶位
事主似乎最後企硬沒有讓座，一直坐最後一個站，故此她看到該對母女事後成功搶到其他座位，該對母女在成功搶位後僅坐了兩個站便下車，令事主不禁質疑「小朋友企兩個站係咪都企唔到？」
網民對涉事母女的行為感到十分不滿，直指兩母女都無家教，「做小朋友都可以學吓讓座比有需要嘅大人」、「而家啲小朋友企一陣都會死」，又指單憑此事就可以看到「教育幾咁重要」、「個媽無教育咪唔識教子女囉，是為無家教也」。
網民意見一致：唔會讓座畀小朋友
對於讓座與否，一直都是社會一大難題。上述事件公開後，引來大量網民的熱烈討論， 他們一致認為絕對不會讓座給小孩子，紛紛表示「唔會讓比小朋友，咁好精力係度玩係度噪企下唔得？又唔係病又唔係攰到企唔到」、「就係小朋友先唔讓 咁後生 體力仲好過我 洗乜坐」、「唔會讓比小朋友，尤其啲又嘈又跳嚟跳去又奉旨人要讓比佢嘅小朋友」、「啲小朋友坐低咗咪又係好似patpat有刺咁勁快企返起身喺中間啲柱度玩，真係咁有需要讓咩」。
網民：只會讓座予三種人
此外，也有人提出只會讓座予三種人，就是長者、傷殘人士及受傷人士，「點解要讓小朋友，小朋友咁有活力可以企好耐，除非好老/傷殘人士，否則唔會讓囉」、「通常老人家或者受傷先會讓，我學校就真係冇教過要讓小朋友嘅 一向都係讓比有需要嘅人，點解小朋友就一定要讓 呢d冇禮貌嘅更加唔會讓」。
