與男友家人去完旅行先知AA制 港女鬧爆：好小家
有網民在Threads以「同男友屋企人去旅行終於見真面目！」為題，當中講到與男友戀愛3年，每個月有幾日都會到對方屋企食飯，平時都有講有笑。
早前，男友一家計劃去北海道旅行，對方母親甚至邀請女事主一齊去：「一行5人有我、男友、爸媽同佢細佬，我男友差唔多負責晒所有住宿同行程，中間都會問下我意見，我又幫手搵下，而因為家庭旅行男友都揀咗啲比較好（貴）嘅住宿，又想試下唔同溫泉旅館，話想食好啲住好啲，廢事老人家辛苦。」
男友回港後提出AA制 港女不滿：唔係應該請埋我去㗎咩？
去旅行途中相處正常，並沒有發生甚麼事情，當一切看似順利，回到香港後，男友卻她提出一個出乎意料的要求：「男友問我拎錢，話佢呀媽想AA制夾返旅行洗費」對於這個要求，女事主相當愕然：「心諗當初你呀媽叫得我去，唔係應該請埋我去㗎咩？」
其中，最令到女事主不滿的是：「之前言談間知道男友會請佢細佬去，咁點解我就要畀錢？」因此表示如果知道自己要夾錢，就不會同意住價格高昂的酒店：「而且我係被動個嗰，去旅行食咩住咩都冇得Say，宜家咁根本就叫我硬食咁多錢！！」最後更強調自己並非畀唔起：「係覺得佢呀媽好斤斤計較」
網民反指女方做錯3件事：老馮請埋你？
而帖文下方更有「二選一」的投票，分別是「你男友真係好孤寒」VS「你邊位啊？老馮 一定請埋你？」投票結果為前者佔28%，而後者為72%。而評論中有不少網民認為女事主做錯3件事。第一，不應該默認男方家人要支付全額旅費；第二，人地唔出聲， 基本禮貌都要支付相關的費用，第三，話唔係「畀唔起」但係又要鬧男家小氣。
網民紛紛留言表示：「唔明點解邀請你去等於請你，呢個諗法你屋企教你架？」、「始終未入門，數還數路還路，佢要計你冇符。」、「點解你會覺得人地叫埋你就=請你？ 唔通friend叫你一齊食飯就=請你食飯，除非人地開口講明請你 否則都唔好預人地請」、「去旅行夾錢應份的，同邊個去都一樣，人地收唔收一回事，比得起就無謂斤斤計較。」、「一開始assume 人地請埋你，已經好失禮，就算人地話請埋你，都要俾返錢人地，呢啲女真係唔識大體」
網民反轟男方都有錯：媽寶男！
不過，亦有網民表示男方全家都有問題，表示幸好二人還沒有結婚：「襯依家你同男友感情冇咁深嘅時候好分手，你男朋友個媽咪將來同我個食屎奶奶應該係同一類人」、「成件事， 你男朋友唔講清楚，仲要佢阿媽一叫就問你拎返。 佢完全唔成熟。 唔識做人亦唔識安排。」、「佢阿媽提出嘅時候，你男朋友就應該保護你啦，仲好意思走來問你攞錢，媽寶男？」
