文：Kassidy｜圖：Day
澳門 teamLab 影相位逐個數
雖然澳門 teamLab 主打親子互動體驗，一眾去到想打卡的港女們絕對唔使灰心。在記者精挑細選下，4個園區裡面都可以找到最少5個影相位，記住著定套淺色衫去瘋狂影相！
01｜山脈與山谷：彩色投影
呢部分定必是澳門 teamLab 最矚目的影相位，有不同動物的投影會在山谷出現，入到去可以同投影動物互動兼同佢哋合照，但係要預咗呢個區域非常多人，所以入到場館後，第一時間記住即刻去呢個位！
02｜巨型投影鯨魚
呢隻鯨魚會喺山脈與山谷之間到處遊走，唔使迫入山谷位都有機會影到呢隻鯨魚，彩色燈光打落塊臉度再影相會非常好睇！
03｜聖誕倒影彩繪
啲人成日講嘅「天空之鏡」同樣可以喺度搵到，以為呢一部分螢幕剩係用嚟做互動同投影就太浪費，細心一看地板非常反光（也要小心裙底走光），走到螢幕前面，除了有投影打落件衫度，仲可以影埋地板上的倒影。
04｜彩色光球
呢個位睇落只有玩嘅元素，但其實影相都一流！因為天花同地下都會充滿彩色光球，只要一觸碰佢就會轉色同發聲，港女們都可以攞住個彩色波嚟影相。但要記住！千祈千祈千祈唔可以拋起個波，用推同碌嘅方式就最好。
05｜最後一站：霓虹光管
以為玩晒成個場就可以收埋相機就大錯特錯，離開之前仲有一個打卡位，用霓虹光管寫成的「Bring Art to Life」，絕對不能錯過這個位置。
記者教路 入teamLab前必讀！
每個時段只限150人進場，記者去的當日有30、40人已經要等位影相，仲要場地暗，唔容易影得好，即刻睇記者去完澳門teamLab後最齊全的入場攻略，幫女朋友/閨密好好影相！
入場攻略01｜手機影都得，相機更佳
總有一啲人去到以為 iPhone 可以走天下，但teamLab燈光都比較暗，用電話影感光度不足，好容易影到非常多雜訊，放上Ig一點點都唔好睇，所以唔想女友失望，請準備一部相機去。
入場攻略02｜著淺色衫更好睇
入到 澳門 teamLab 咁黑嘅環境，著深色衫只會令自己完美地融入背景，倒不如著淺色衫凸顯自己，燈光投射落去淺色衫也會更好睇。
入場攻略03｜周末6:00pm人流最少
teamLab嗰邊就講到，因為暫時已經賣出超過一半的門票，想少人啲入到去影相，當然揀最好的入場時間。暫時來說一定是平日最佳，如果一定要周末進場，揀6:00pm時段會比較少人，捱一陣餓，影完出嚟再去食！
入場攻略04｜著平底鞋
場內有兩個位置都禁止著高跟鞋入去，一是光球影相位（怕整爛光球），第二個就是山脈與山谷（一大個凹位），唔想入到去要除鞋咁麻煩，都是乖乖的著平底鞋入場吧！
入場攻略05｜禁止自拍棍、腳架、閃光燈
入到去是絕對嚴禁使用自拍棍、腳架同閃光燈，因為非常騷擾其他遊客，而且會有小朋友走嚟走去，所以去teamLab想影相，記住帶多個伴去幫手揸機！
澳門teamLab未來遊樂園
日期：2017年12月1日至2018年2月28日
地點：澳門美高梅展藝空間
時間：1:00pm-10:00pm（一至五），10:30am-10:00pm（周末及公眾假期）
門票價錢： 普通票價MOP150，澳門居民票價MOP120
網址：澳門teamLab
相關閱讀：蠟筆小新登陸澳門！澳門蠟筆小新特展春日部大冒險
前往澳門有哪些交通方法？
可以選擇金巴或港澳快線或金光飛航及噴射飛航。到達澳門後，則可坐輕軌氹仔線，途經碼頭、機場、多間酒店及主要旅遊區，澳門自由行時交通更加方便！而澳門酒店由設計到設施都非常出色。
有什麼澳門好去處？
澳門有不少新設施及全新好去處，其中澳門賭場、必去景點及食買玩介紹，玩轉澳門！然而，澳門美食眾多，除了豬扒包，也可到各大酒店享用自助餐及打卡必去的陽台Cafe當半日文青。
