100元食飽2人 下環熟食中心
澳門人飯堂—下環街市2樓的 熟食中心有 超過30檔小店，大部分的食物都大件夾抵食，當中有不少都是傳統美食或即叫即整，只需MOP100就可買到7樣食物，兩個人share都飽到捧着個肚走，難怪超多澳門人聚集啦！熟食中心內的店舖一般8:00am營業，賣完即止，好多都4~5:00pm就收檔，想食就要早啲去啦！
下環街市熟食中心
地址：澳門李加祿街下環街街市大樓2樓
電話：+853- 2833-7676
營業時間：7:00am-8:00pm
交通：巴士路線9、16於「下環街市」站下車
撈麵分量超多 用料新鮮
經常都大排長龍的招記美食主打車仔麵，賣點是配料超多選擇，魚餅、豬扒、鳳爪、雞翼、大腸等等，普通單餸麵只需MOP16-20，雞翼魷魚撈麵分量多，新鮮即燙魷魚食落超彈牙，三大隻雞翼亦比坊間肥美得多，加入惹味滷水汁，大大份都只是MOP27，男仔食都一定夠飽！
招記美食
檔號：3-26
營業時間：7:00am-8:00pm
即泡奶茶 茶味超濃
香港絲襪奶茶向來出名，原來澳門都有馳名的奶茶，沖法與香港大不同：先放熱水焗茶葉2分鐘，不時攪拌，讓茶味散發出來，再倒進預先加了奶及糖的杯內，喝起來更幼滑。飲奶茶自然想食多個包，即烘油多塗上厚厚的牛油，再灑上砂糖，下午茶時段tea一tea，好滿足！
泉記咖啡美食
檔號：A24
營業時間：11:30am-6:00pm
街坊最愛 懷舊紅豆餅
擁有60多年歷史的吳廷記主打各種傳統小食，包括已經很少地方製作的冷糕，以及招牌作紅豆餅。紅豆餅每日現場製作，攞上手仲熱辣辣，裏面加了超多的紅豆餡，每咬一啖都會爆餡，好正！
吳廷記
檔號：3-02
營業時間：9:00am-5:30pm
每日即製 新鮮豆品
寬記豆腐花以每日新鮮自製的豆漿及豆腐花，獲得很多街坊支持。與一般豆品舖加糖水或黃糖的做法不同，寬記豆腐花的特別之處在於可以加蔗糖及淡奶，本身已經很滑的豆腐花加入了淡奶之後，滑上加滑，食落仲有啖啖奶香！
寬記豆腐花
檔號：3-10
營業時間：8:00am-6:30pm
家族秘製 獨家叉燒麵
街坊小店除了便宜，最吸引的是人情味，梁基食店老闆娘超級熱情，每一樣食材都是自家製作，叉燒麵加蛋的叉燒是家族秘方，一代傳一代，雖然是瘦叉燒，食落一啲都唔嚡口，而滷蛋亦滷得超入味！小店的糯米糍更是老闆娘自製，糯米皮比平時食開的厚，食落更加煙韌有糯米香！
梁基食店
檔號：3-17
營業時間：8:30am-6:00pm
真材實料 實心雞蛋仔
雞蛋仔其實香港都有，但明記美食勝在真材實料！伯伯會預先整好雞蛋仔，有客人買時，再將雞蛋仔烘熱一次，保證食到熱辣辣、外脆內軟的味道。比起好多空心的雞蛋仔，明記的口感超扎實，食落認真有驚喜。
明記美食
檔號：3-06
營業時間：10:00am-6:30pm