撰文：EL｜攝影：Man
澳門銀河 自助餐－榴槤放題
「馬來西亞美食節」已經連續第7年在澳門銀河酒店舉辦，當中最具噱頭的當然是水果之王－榴槤放題！相信近年的榴槤控，已不能滿足於市面常見的泰國金枕頭榴槤，愈食愈嘴刁，遂轉食高質的馬拉榴槤，正正是今次「馬來西亞美食節」的主角！
10款馬拉榴槤 即開即食
馬拉榴槤每朝都會新鮮運到，不過由於靚榴槤難求，餐廳所獲的供應量每日不同，每天至少有8款榴槤供食客品嘗。記者在餐廳門外，已聞到陣陣榴槤香。一共有10款馬拉榴槤，包括：港人最愛的貓山王、 D24、D888、D101、紅蝦等等，全部即開即食。
「貓山天后」5大推介
榴槤當前，當然想試齊10個品種，但始終胃口有限，食唔到咁多。為免大家浪費Quota，「貓山天后」Anna推介大家必食以下5款，絕不可錯過！
1｜初級者首選－IOI
IOI產自柔佛州，果肉呈深黃帶紅，口感軟綿creamy，甜味淡身不霸道，容易入口，最啱初級者品嚐。平時雪藏貨會帶有微酸，不過今次放題新鮮即開就無這個問題了。Anna建議最好放題一開始先食IOI，作為熱身，也不怕被其他品種的味道蓋過。
2｜「蘇丹王」D24
有「蘇丹王」美譽的D24不用多說，其味道濃郁，甜中帶甘，堅果，口感粘稠，大家都它十分鍾愛。
3｜D197－貓山王
大家可能對D197有點陌生，不過一聽到它的中文名你一定認識，它正是「貓山王」。果肉金黃有光澤，柔滑粘稠，味道濃郁有層次，入口先是甜味，其後帶甘苦，after taste尤其凌厲，餘韻足以停留在口腔內2至3小時。Anna建議最後才吃貓山王，因其味道霸道，只要一吃，便再吃不到其他品種的味道，果然好嘢都係要壓軸。
4｜狀元王
「狀元王」一名比較少聽，但來頭不少，是今年馬來西亞洲份比賽的冠軍，剛掘起的新品種，帶有香濃棒果味。今次Anna專誠從當地引進來，給大家率先試今屆王者，怎可以錯過！
5｜D163「葫蘆」
於1987年在浮羅山背舉行的榴槤大賽上奪冠的D163「葫蘆」榴槤，果肉厚實，口感香甜綿密，味道帶微苦，有人甚至食完覺得有陣朱古力味。
同場加映－馬拉美食自助餐
單食榴槤都已經回本，不過記得要留肚食埋自助餐，包埋㗎！話明馬來西亞美食節，主辦餐廳邀請了15位馬來西亞街頭人氣名廚，炮製馬拉小食，包括阿順煎蠔、肉骨茶、加影沙嗲、炒粿條等等。
必試邦咯叻沙
邦咯叻沙更是必試，魚湯底集酸甜辣於一身，配上自製瀨粉，滑身爽口。食之前拌入蝦膏，零舍香口。食完更開胃，最啱食榴槤中途食一碗，刺激一下味蕾之餘，增進一下食慾，繼續再戰。
全新榴槤創意菜式
除了馬拉美食，今年特別新加榴槤入饌的創意菜式。記者初初都以為榴槤入饌會很奇怪，但吃過後有另一番驚喜。
榴槤芝士龍蝦
用上波士頓龍蝦，肉質爽彈。面頭鋪上芝士磨菇，再加上D24榴槤茸，味道十分濃郁，但略嫌蓋過了龍蝦的鮮味。吃半隻已經足夠，多吃的話有點膩。
榴槤釀雞翼
莫非是將大大件榴槤肉釀入雞翼內？非也。是將豬肉碎釀入雞翼內，再混入榴槤醬，醃1日1夜，再經過汆水、風乾、烤製等程序，最後搽上榴槤蜜汁，比起一般蜜汁燒雞翼多一份層次，甜中帶少許榴槤回甘，絕對值得一試。
燒榴槤椰汁糯米飯
榴槤糯米飯落足心思，先用椰子油和鹽醃D24榴槤肉，煙燻2小時，再用180度炭燒45分鐘，令榴槤更軟腍，更滑溜，吃起來有陣陣煙燻味，令D24味道更突出。糯米飯口感煙韌，正好中和榴槤的甜。
金箔榴槤Pizza
薄薄的批底鋪滿榴槤肉、馬蘇里拉芝士和金箔，睇頭十足，不過比較飽肚，都是一件起一件止，以免填飽肚子，浪費quota。
榴槤酥盒
用廣東酥皮點心做法，鬆脆酥皮包著D24榴槤漿，入口鬆化不油膩，令人想一吃再吃。
榴槤鮑魚椰子燉雞湯
食榴槤難免會燥熱，廚師精心研製出用榴槤殼的白肉部份和椰子一同煲湯，有清熱作用，幫大家下一下火，飲落好清甜。
清熱果后－山竹
除此之外，同場並提供大量山竹、紅毛丹和椰皇給大家清熱，十分貼心。
早鳥優惠－每位MOP$428
是次「馬來西亞美食節」將於8月16日至31日舉行，由即日起至8月10日期間預先訂位，每位只需MOP$428，8月11日打後訂位，就要每位MOP$588。即是愈早訂位愈著數！
澳門銀河「馬來西亞美食節」
地點：澳門銀河天浪淘園綠洲宴會廳
日期：2018年8月16至31日
時間：5:30－8pm、8:30－11pm
訂座方法：+853-8883-2221、www.galaxymacau.com
下一頁：【澳門好去處2018】2日1夜行程懶人包｜全新景點：澳門LINE展、幪面超人展、$288酒店自助餐
前往澳門有哪些交通方法？
可以選擇金巴或港澳快線或金光飛航及噴射飛航。到達澳門後，則可坐輕軌氹仔線，途經碼頭、機場、多間酒店及主要旅遊區，澳門自由行時交通更加方便！而澳門酒店由設計到設施都非常出色。
有什麼澳門好去處？
澳門有不少新設施及全新好去處，其中澳門賭場、必去景點及食買玩介紹，玩轉澳門！然而，澳門美食眾多，除了豬扒包，也可到各大酒店享用自助餐及打卡必去的陽台Cafe當半日文青。
