澳紐一生人一次 | 高空跳傘 5大貼士

從14,000呎高空一躍而下，原本以為會好驚，結果係 超・爽 ！！！
由跳出去到落地約1分30秒，就燒咗我約HK$1,744。

再另加約800蚊買handy cam段片+相……
落到嚟第一句係：「好正呀！我想跳多次⋯⋯如果有錢（重點）。」

好多人會問：「澳洲定新西蘭跳好啲？」
我跳前如是問教練，佢嘅答案好發人深省：「無論喺邊度跳都一樣，最重要係你跳過。」

所以世上只有分「有跳」和「冇跳」兩種人，跳傘地點何足掛齒：）

後來我發現喺新西蘭跳，過程快好多，個景又靚啲，但因為教練嗰句，我冇後悔到！！！

不過新西蘭比澳洲嘅價錢都貴成一千蚊，大家可以自己衡量下CP值～

跳前請睇 5大貼士

01 | 唔好睇小高空低幾度，加埋大風，真係超寒！即使係夏天，都建議著番件外套～

02 | 頭髮最好all back，係要連前蔭都夾起晒，否則劉海向上飛，會變成洋蔥頭的。（我就是失敗的例子）樣衰之餘，仲會唔覺意阻住教練視線。

03 | 澳洲跳的話，連市區接送佔半日時間，新西蘭的話，自駕去到Centre即刻跳得！
我曾經陪朋友冬天去新西蘭跳，可能因為淡季，填完生死狀、整裝就直接上小型飛機。相反我嗰陣喺澳洲跳，預成半日時間，一車參加者由市區接駁到郊區，呆等半日先輪到我，即使其他人幸運晨早跳完，亦要等齊成隊人先開車走。

04 | 澳洲拍攝套餐：Handy cam同額外搵個cam man一齊跳嘅差價係HK$350，我當時仲係窮書生揀咗前者，依家諗番其實價錢唔算差太遠，都唔爭在嗰少少啦～

05 | 高空跳傘 宜安排喺行程前段，因為天氣因素（如風力、雨勢）都會影響跳傘要突然取消，預番時間走盞，不幸被改期都仲有機會跳！

GOOD LUCK TO YOU ALL！