深圳無印酒店率先試住報告｜每晚950人仔包早餐享受全套無印產品！

Q: 深圳有什麼必食及好去處推介？

GOtrip編輯部搵齊5間人氣又抵食火鍋店，而當中比起辣雞煲，近年深圳更加流行椰子雞，即睇： 火鍋店推介 及 深圳商場美食 。商場方面，則可到 4大商場 ，全部都在深圳地鐵沿線。如果打算玩兩日一夜，大可參考 深圳酒店推介 。

Q: 回鄉證過期了要如何續期？

中旅社已全面實施網上預約申請回鄉證，現時不能即日排隊領取籌號辦理回鄉證，但各中心會按情況提供適當的協助... 詳情請看

講到2018年最令人期待的新酒店，絕對係全球首家無印直營MUJI Hotel要喺深圳開的消息！唔少無印迷都非常期待呢間新酒店，聽日（18/1）終於正式開幕喇！記者於開幕前一晚率先試住，想知深圳直營店可唔可以維持無印一貫的風格，同埋抵唔抵住的話，即睇介紹！

text： Cynthia｜photo：Man、無印良品

無印深圳開新酒店

近排愈來愈多香港人會趁周末返深圳飲喜茶、食海底撈，對於深圳的蒲點都好了解，不過可能未聽過深業上城呢個新場，也就是全球第一間無印酒店的所在地。於福田區的深業上城，與深圳無印同日1月18日開幕，記者獲邀於1月17日與一眾內地、日本記者共同入住，以下就由特派記者報告一下試住感覺！

＝＝＝無印於深圳開酒店，好多人都十分期待！

MUJI 酒店強調環保理念，所以酒店好多地方都係採用舊木、廢物再利用，令無印酒店有特色之餘，亦可以符合環保概念！

優點1：價錢唔算貴 RMB950/晚起

MUJI Hotel的4至6樓共有79間客房，分別有5種房型，全部都是雙人房，基本配備相近，最大的分別在於每間客房的大小。

最平的人民幣950/晚，價錢已包早餐，兩個人每人500蚊就住到無印酒店，仲要食到MUJI Diner的食物，相當划算！

最大的房型E 要成RMB2,500，但有51-61m²，大大塊落地玻璃對住公園景，景觀都算不錯，加上有衣帽間、MUJI 桌椅梳化慢慢嘆，有能力豪嘆不妨一試！

怕酒店Wi-Fi慢又無準備到電話卡？依家用450Club積分就可以換到2日中國大陸數據漫遊優惠組合^，立即下載The Club app：http://p.nmg.com.hk/kq3456

優點2：房間一貫無印風格無印迷大愛

房內貫徹無印簡約風格，由深澤直人設計的壁掛式CD播放器，已經預先入碟，播放統一無印店內可以聽到的音樂，所以一行入每間房，就可以聽到熟悉的無印音樂。

每間客房都配備的牙刷、牙膏、浴帽、化妝棉、洗髮液、護髮素、沐浴露、洗手液、電水壺、拖鞋等等，通通都係無印出品，儘管你屋企本身已經用齊呢批日用品，但咁樣夾埋無印酒店，感覺爭好遠！

如有未用過的MUJI產品，或許可以在酒店一次過試勻！

即使用開無印沐浴用品，屋企個廁所都唔會fit成咁擺得咁整齊！

而每一間房間的空間感好夠，主因是樓底有成3米，加上有塊大大的落地玻璃，空間感十足！

優點3：房內免費位多

MUJI 酒店的每間房內，都會有掛耳式咖啡包、茶葉，以及2支水可以免費飲用。唔好睇小2支水，包裝係由深澤直人全新設計，而且店舖都暫未有得賣！

房內的酒店指南仲寫明，牙刷、拖鞋、墨水筆都歡迎帶走留念！

優點4：酒店設施完善

酒店雖然只有6層，唔算大規模，但該有的設施都應有盡有！健身房免費使用，有埋更衣室夠方便。落地玻璃對住新商場的品牌街，而且健身房6:00am-11:00pm都有專人指導，相當貼心！

Common room 內有個大大的書架，650本書可以借來看，但只限於common room 同會議室範圍，千萬唔好攞走！

會議室可以同時容納200人，亦可以1開3變成3個細會議室，有需要開會的話可以借用。

優點5：MUJI Diner 嘢食更平！

香港雖然未有MUJI Diner，但Cafe & Meal 普通一個4餸飯都要過百，深圳MUJI 3餸都只係RMB58，2熱盤加1凍盤，仲有湯加飯，而4品都係RMB68，5品RMB78，不過記者食完，覺得味道一般！

無印酒店缺點1：地點不算便利

MUJI Hotel 與最近的地鐵站蓮花村站大約是2公里的距離，步行過去起碼要15-20分鐘。好在與皇崗、福田口岸都算近，從皇崗口岸坐的士10分鐘內就到，實測車費才RMB17，唔使諗啦！而福田口岸搭的士大概亦只需10分鐘，RMB22.5車費，如果想入住，建議搭的士最方便！

缺點2：景觀相當一般

雖然有塊大大的落地玻璃，但只有一個房型可以對住蓮花山，記者入住的房型對住時尚購物街，有兩大棟高樓阻擋視線，影響景觀。

房間只有4樓有露台，只可以容納一個人行出去。酒店4樓放了一隻超大的船，據說是可以反映深圳的漁港歷史，雖然好有歷史意義，但如果房間對住呢條船，都會覺得幾悶。

缺點3：Wi-Fi 較慢！

另一個香港人最關心的問題，就係酒店 Wi-Fi！目前酒店Wi-Fi相當緩慢，想上網睇片都會有啲慢，加上好多香港網如WhatsApp、Instagram 都上唔到，如果要同香港朋友聯絡，都係買電話卡比較好！

無印良品旗艦店率先逛

走三合一路線的無印酒店，集商店、餐廳、住宿於一身，本來以為深圳無印良品旗艦店會同香港嘅一模一樣，但原來都有驚喜！唔單止賣嘅嘢有少少唔同，仲有工作坊！

特色1：5分鐘自選刺繡

香港未有的刺繡工坊可以喺深圳旗艦店搵到，店員仲話5-10分鐘就有，不過可能因為仲係試業階段，記者等足45分鐘先攞到！

客人只要購買指定無印產品之後，就可以即場刺繡，3個字以內收費RMB30，選擇指定圖案每個RMB10，而自繪圖案8cmX8cm就要RMB230，要整DIY簡單做手信唔使喺日本做喇！

特色2：孕婦裝都有！

香港無印有齊男裝、女裝、嬰兒裝，但偏偏就係冇孕婦裝！以後懷孕媽媽，不妨北上買靚衫！

特色3：RMB5 一支筆！

同香港的唔同，深圳無印有時會有特別減價，記者就搵到有款擦膠筆係香港冇嘅，重點係一支只要RMB5！做手信都抵啊！

原子筆寫完即擦好方便！

特色4：國產零食

無印生意可以咁好，好大原因都係因為made in Japan。記者發現深圳無印有好多新產品，仔細一睇，原來好多都係made in China！產地來自惠州、浙江等都有，唔少口味都好「中國」，想買made in Japan 的無印產品，就要睇清楚產地喇！雖然made in China，但都有依足日本生產規定，食得安心！