撰文：Cynthia｜攝影：Fion｜編輯：J
深圳好去處｜觀瀾湖親子、情侶遊
深圳觀瀾湖位於龍華新區，地點來說其實不算方便，好在皇崗口岸有專車接送，搭30分鐘左右就會到達園區。園區裡面也有免費的Shuttle bus，接駁往來不同景點，包括高爾夫球場外、手作工藝坊、靚cafe、度假酒店、生態體育園等等，可能兩日一夜都唔夠玩，一齊睇睇以下食、玩、住的行程推介！
深圳好去處觀瀾湖篇：推介1｜手作工藝體驗
在玩方面，觀瀾湖毫不輸蝕，有各種文青最愛的傳統手作工藝，包括有皮藝、布藝、紙藝、木藝、陶藝、金工及玻璃，可以在專人的指導下，親自落手落腳試玩試做，完成之後還可以把成品帶回家，好有紀念意義。
記者參觀的時候，剛好遇到一大班小朋友在上藍染課，由於工藝區不時都有免費的體驗課程，歡迎大人及小朋友參加，經常都會十分熱鬧！而老師會先教授染布的相關知識，再讓小朋友親手去做，還有拼貼布、做衫等課程。
好多情侶都喜歡送皮革製品畀另一半，親手製作更有意義！皮藝課程讓大家可供即場製作passport套、銀包、手環、卡片套等都無問題。另外金工堂還可自製耳環及戒指，好有心思！
記者當日最期待的就係燒玻璃，但好可惜燒爐壞咗，所以無法體驗，如果想試，安全起見都要提早幾日book定！
如果唔想花太多時間做體驗，又想行行文青產品，藝工場的底層就是逛逛的好地方，產品全部都是由著名工藝大師製作而成，當然價格都相對較貴，不過亦不妨Window Shopping，欣賞一下。
深圳好去處觀瀾湖篇：推介2｜大量打卡Cafe、酒吧
對於各位女生來說，其中一個不能沒有的行程，就是打卡。觀瀾湖新城藝工場設有一連3間風格各異的Cafe，想打卡或者hea番一個下午的話，就記得去了！
近期花花cafe成為大勢，鮮花加上書店的搭配，自然係最佳的影相地點。蔓花園設計十分用心，無論是吊燈、木書架還是藤椅，都營造了一種非常放鬆的感覺，加上人流不多不算嘈吵，可以慢活一下。
不喜歡太少女，走型格路線的Gee Coffee Roasters 肯定更合意，由香港咖啡達人Felix Wong(黃劍斐)所管理，走的是精品咖啡路線，喜歡細細品味咖啡，可以同閨密或男友一齊去歎番杯。
想去Live House聽音樂，就可以揀酒吧紅糖罐，入面環境好Chill， 聚集了好多玩獨立音樂的人，就連王力宏的MV都在此拍攝，可惜記者中午前往無咩睇頭，相信夜晚一定會好玩得多！
深圳好去處觀瀾湖篇：推介3｜Hard Rock平價自助餐
Hard Rock保持了酒店原有的搖滾音樂精神，四處掛滿的結他、巨星舞台裝、黑膠唱片，都可以感染到遊客！
Hard Rock 自助晚餐選擇夠多！重點回本區的凍海鮮有蟹、青口、蝦、蜆、螺及瀨尿蝦等，選擇不少！
最值得欣賞的是有很多即製的食物，包括牛扒、羊架、帶子、魚等全部任你揀，廚師再即場在開放廚房燒，即燒即食仲正！
熱盤有不少都是海鮮類，唔想食太多生冷嘢可以一戰！最特別還是有即煮的四川冒菜，加入麻辣的湯汁，重口味者必試！
甜品同樣都不輸蝕，除了一般的蛋糕外，還有即製pancake、炒雪糕、朱古力及士多啤梨噴泉，不過朱古力漿感覺太稀，有點失色！
深圳好去處觀瀾湖篇：推介4｜高質西餐廳
不想花太多錢食自助餐，觀瀾湖園內的餐廳質素也不錯，當中以THE PATIO CAFE 最值得推薦，餐廳內行英倫風，一家大細或者成班朋友一齊聚餐都可。
餐廳內的食物都水準不俗，以燒雞最令人驚喜，雞皮燒得十分香脆，而肉質依然可以保持嫩滑，一點都唔會覺得嚡！
店內還有新鮮的果汁，以及每天出爐的麵包！賣相吸引之餘，更加是香氣撲鼻，每晚6點過後，麵包更有買一送一的優惠，唔少客人都會買個做早餐。
深圳好去處觀瀾湖篇：推介5｜閨密齊歎Spa
玩足全日飲飽食醉，自然想做番個Spa歎一歎，園區內超大的Spa水療中心，體驗服務很多，包括有驅寒全身按摩、水療面部護理、淋巴排毒等，甚至還有親子及男士專享的水療套餐。
深圳好去處觀瀾湖篇：推介6｜舒適酒店環境
坐落於高爾夫球場內的酒店，酒店房間配套設施都十分齊全。一共有188間房，6個房型，由於四周被植物包圍著，因此露台對著的景色一般都是植物或高爾夫球場，令人十分放鬆。不過可能春天的關係，濕氣較重。
每間房內都有一套的茶具以及茶葉，想要飲用就要另外畀錢，不過就有種中國風的味道。而酒店在客人入住之前，都會先在房內點上香茅味的香薰，記者就覺得有點似蚊香，不過都唔會難聞。