【激安99円新品牌】100円店的市場愈鬥愈激烈，DAISO、Seria、CouCou…… 十多個品牌記都記唔晒！最近傳出「激安」（DONKI、驚安之殿堂）投入戰場，並以「平1円」的戰略挑戰DAISO！作為遊客，我們當然盡享「漁人之利」啦！
撰文：主場・日本 | 圖片來源：官方網站
新品牌賣點：影相呃like！
「激安」的99円均一新品牌名字叫做「Re:LIKE!」，第一彈推出派對用的紙餐具，全系列都是以粉紅、黑、白色作主調，講明畀女生「影相呃like」（写真映え）專用，官方Ig仲搵專人做stylist教你點影！全部都好靚，最緊要係抵，想買晒返香港開party呀！快啲睇下成個系列有咩賣！
01 | 「顏色」錫紙
嫌平時銀色的錫紙太悶蛋的話，呢款一定要買，其中一面係有顏色，更有黑色及粉紅色2款，又靚又實用，包朱古力、包糖最啱！
02 | 「啤牌」紙碟
呢4款紙碟擺明畀大家影呃like食物相，每款都有黑及粉紅色2個設計，每套有8隻。
03 | 密實袋
可能近年已經有好多有圖案的密實袋，所以呢款產品顯得冇咁特別，不過日本人好喜歡將食材分成小包處理好先放入冰箱儲存，其實需求量好大，所以當然要推出！
04 | 膠枱墊
共有3款設計，平時喺屋企食飯都要影相呃like的話，膠枱墊絕對是「must-have item」！
05 | 餐紙
本來覺得白色的餐紙係最好，睇完下面經stylist執完之後影的相，原來靚靚餐紙真係可以令食物（睇起來）更美味！
06 | 圓形紙碟
除咗啤牌紙碟，仲有普通的圓形紙，共有4款，每款入面再有2種不同設計。
07 | 長方形紙碟
如果食物太大件點算呢？好貼心，同系列仲有出長方形的紙碟！
08 | 紙杯
成個系列紙杯係最實用，就算唔係放飲品，用來插筆或一支支的化妝品都好！
