撰文：主場・日本 | 圖片來源：新傳媒資料室、Cando官方Ig、DAISO官方Ig、電視截圖
01 | 買埋好多唔等使嘢
唔關質素好定唔好嘅事，明明平時都唔會用，但因為平，總之就買咗先，反正都係100円之嘛！
02 | 超市、藥妝店可能更平
100円店賣的商品，未必全部都係平，如零食及膠樽裝飲品，超市或藥妝店可能更平！
03 | 收納用品在家堆積如山
以為買咗會整理好屋企的雜物，但因為太平，愈買愈多，結果其實冇用到，反而變咗屋企的「雜物」！（唔係個個都可以成為「收納達人」！）
04 | 被200円、300円商品欺騙
「呢樣100円咁抵？！」畀錢的時候先發現，原來係200円或300円！
05 | 經常見到爆買的中國人
最近的100円店愈開愈大間，入面大部分都係瘋狂掃貨的中國人或泰國人。
06 | 100円的碗碟唔易打爛
本來諗住如果屋企的100円碗碟爛咗，就會換過啲高級碗碟！但意外地，用極都唔爛，想換都冇藉口！
07 | 唔記得買本來想買的東西
本來為咗買某件貨品而去100円店，但結果買咗一堆冇關係的貨品，離開之後，先發現唔記得買想買的東西！
08 | 店員唔知貨品的擺放位置
因為貨品種類同數目都非常多，成日都搵唔到，就算問店員，好多都答唔到你，結果同你齊齊搵！
09 | 筆記簿品質差
100円店的筆記簿雖然平，但品質差劣，紙非常薄！
10 | 幾支裝的筆非常劣質
100円12支的顏色水筆，當中有一、兩支係寫唔出色的！
11 | 針織製品一定拮肉
針織製品絕對只係「100円的質素」，如頸巾、手套，一定拮肉！
12 | 指甲油愈買愈多
因為平，所以見到有新顏色、新樽，都忍唔到手買。但最後，屋企儲埋好多支，唔少開都未開過，或已經乾咗！
13 | 包裝用品種類非常豐富，最幫到手
包裝紙、masking tape、貼紙、不織布袋等等，選擇非常之多，送生日、聖誕禮物畀朋友或情人節時最幫到手！
14 | 以為好快會壞的貨品，結果好耐用
買的時候唔期望佢襟用，結果用好耐！但之前成日聽人講話好好用的商品，結果好快壞！
15 | 商品轉換得好快
用過好用想再買的商品，搵極都搵唔到，結果店員話「已經唔再返貨」！
16 | 去到外國都會行100円店
唔知點解，去外國旅行，都會忍唔住走入100円店逛逛，睇下有冇日本冇賣的東西！
17 | 旅行用品選擇多
衣物的收納袋、可以摺埋的拖鞋、包裝洗頭水化妝品的小膠樽等等，100円店有好多又平又實用的旅行便利用品（香港人最常用應該係壓縮袋）！
18 | 會仔細check清楚先買
雖然只係100円，但因為商品的質素好參差，通常都會check下先買！例如布製商品有冇走線，又或者膠箱駁位有冇膠水跡等。
19 | 會出現奇怪的字
因為好多都係由中國或其他國家製造，成日都會出現「奇怪的字」，如「シ」會變成「ツ」、「ン」變成「ソ」！（除了日本人或識日文的人，其他人係唔會發現！）
20 | 剪毛頭機好好用
DAISO的剪毛頭機非常幫到手，絕對係100円店人氣best buy之一！
21 | 會去唔同的100円店買唔同嘢
想買實用的商品，會去DAISO，想買雜貨的話，就會去Seria！
22 | 周末排隊有殺氣
日本人通常都會於周末時購物，所以收銀處經常出現人龍，而間中會有人買1萬円（即100件）商品，排隊的人即刻出現殺氣！
23 | DIY的製成品感覺係「cheap嘢」
經常見人氣bloggers或電視節目上的藝人，用100円店的商品做材料，都可以整到好靚的家居用品或擺設，但自己整起上來，製成品點睇都只係「100円的cheap嘢」！
24 | 大部分都唔收信用卡
雖然可以用信用卡付款的店舖愈來愈多，但仍有不少只收現金。
25 | 100円店搵唔到自己個姓的印章
100円店內只有「大路」姓氏的印章，嗰一刻好羨慕姓「佐藤」、「鈴木」同「高橋」的人！（補充1：唔少日本人工作上都要用印章，普通都要1~2千円一個！）（補充2：香港的話，可能只得陳李張黃何！）
26 | 唔習慣變成108円
消費稅由5%加到8%之後，100円店的商品變成108円，不少日本人都覺得貴了很多！
27 | 小朋友當100円玩具係寶貝
雖然品質差，但結果小朋友都好珍而重之咁玩，非常滿足！
28 | 好多細路走來走去
100円店有好多玩具，細路自然好興奮咁走來走去，平時日本的阿媽都會阻止，但100円店內就通常都冇，因為佢哋都沉迷於揀100円商品！
29 | 去到女仔房，發現100円店貨品會好尷尬
如果讚「好時尚」的話，聽的人應該會以為你串佢，更唔可以問喺邊度買啦！（香港人應該冇呢個共鳴位！）
30 | 收銀機前總見到掉低100円就走的大嬸
常常會見到攞住一件貨走去收銀機處，掉低100円就走的大嬸！收銀員叫停：「要108円（連稅）啊！」但會被大嬸鬧：「又話係100円店！」
延伸閱讀：日本DAISO的7個有趣小秘密 | 銷售量之冠每秒售出5件！
