【雞蛋要點食】自從知道咗雞蛋營養值豐富，又唔會令血液膽固醇超標之餘，仲可以防止血糖值急升後，大家有冇食多咗雞蛋料理呢？雞蛋要點煮先可以吸收最多營養？係唔係生蛋就一定最好？睇睇醫生教授們點解答！
撰文：Carmen｜圖片來源：《林修の今でしょ！講座》
生雞蛋、溫泉蛋、水煮蛋的營養有咩分別？
蛋黃中含有嘅維他命、礦物質，經加熱後會稍微流失，所以生食係最好嘅。
而蛋白中嘅蛋白質，加熱後營養值都不變，而且加熱後仲會提升蛋白質吸收率！所以加熱煮成溫泉蛋、水煮蛋最好。
大家可根據想要攝取嘅營養而改變烹調方法。
例如想增加肌肉比例時，食水煮蛋等烹調過嘅雞蛋，可以更容易吸收蛋白質。但要注意唔好煮得太熟，煮到太硬身嘅話，反而會降低咗吸收率！
醫學上最正確的「水煮蛋煮法」
將雞蛋放入水中，並用大火加熱烹調，沸騰後煮3～5分鐘。
煮成後，雞蛋依然水潤，蛋黃亦呈半生熟狀態。既能透過加熱蛋白提升蛋白質吸收率，亦能不破壞蛋黃中嘅營養值。
醫生亦指出，如果煎太陽蛋嘅話，因為冇咗蛋殼嘅保護，營養都係會有些少流失，但並唔會損失過多。
肚痛時食唔食得蛋？
醫生就話，雖然冇胃口時完全唔需要迫自己食嘢，但個肚唔舒服時，例如係感染性腸炎等情況下，透過食煮過嘅雞蛋嚟吸收雞蛋內嘅營養素，可有效對抗腸內惡菌，改善健康情況。
喺呢個情況下，醫生最推薦嘅雞蛋食法係溫泉蛋。而且據說從研究中發現，溫泉蛋嘅營養素吸收率係各種煮法中最好的！