撰文：Cynthia｜相片：Woody、受訪者提供
變「泰」之前 早種日本情意結
Q1︱從甚麼時候開始迷上日本？
由小時候開始已經非常喜歡日本，無論是日劇、日本卡通都會追看，但當時人工太低，日本又太貴，去旅行多選泰國因而愛上。後來跟電視台做旅遊節目，終於可以初次踏足日本，對這個國家留下很好的印象。
直到5、6年前，事隔15年重踏當年拍攝地點，在北海道見到漫天風雪，瘋狂浸溫泉及自拍，到處都影到好靚嘅相，日本的良好感覺一直沒有減少。相隔一年，我一個人再去了東京15日，就好像是去了大觀園，覺得所有事情都十分新奇好玩，更開始瘋狂購物，自此就沉迷去日本了。
Q2︱曾去過日本哪些地方？
之前曾跟電視台去過北海道，後來又再重踏舊地。而京阪神、沖繩這些熱門地方都去過，雖然有不少地方都值得懷念，有時都會想再去番，不過慣了自己一個去旅行，齋去睇景點影幾張相，又好無聊，又唔想跟團，所以後來都冇再去。
而近年就為了可以shopping而不停去東京，又可以自己一個去，行動又比較方便。
獨遊日本 專注做喜歡的事
Q3︱最喜歡在日本做甚麼？
好多人去日本都係為咗食，但我對日本菜沒甚興趣。去到日本最愛做的，一定係去shopping，搵動漫周邊產品、書刊及公仔等等。大家可能都知道我是007和鹹超迷，所以我每次去東京，都一定會去中野Broadway買懷舊玩具，那裡都是東京旅行最易跌錢的地方。
除了中野，我必定去買三宅一生、山本耀司的服飾，及去原宿買波鞋等，每次都會買到好多嘢返曼谷。所以喺日本咁多個城市當中，我最愛的始終係東京，一年都大概會去3次左右，等買開的店有新貨推出，即去添新衣買新鞋，瘋狂入手！
Q4︱為甚麼每次去日本都係自己一個？
日本我真係唔會同朋友一齊去，因為呢啲冇共同嗜好嘅嘢，係好難一齊去。為了買嘢我飯都唔食，每日行幾百公里(!)，如果呢種行程同朋友去，返嚟真係冇朋友做！我呢種有特殊興趣的人，去日本有個明確目的，唔係為打卡的人，比較啱自己一個人去，唔係好易冇朋友。
Q5︱在日本shopping 時很瘋狂嗎？
絕對是！有一次我去神保町古書街買舊的電影雜誌，真的廢寢忘餐，又尿急，又肚餓，雖然明知冇人會同自己爭，但依然係唔想停，間間店都想行勻搜刮每個角落，記得中途只好去M 記小解同食個包。另外又試過睇中了一對鞋，同款買了兩隻色，結果一次都冇著過！甚至好多時件衫試上身，明明唔合身，平時一定唔會買，但喺日本你就會諗，今次唔買，下次嚟都可能冇喇喎，咁不如買咗先啦！結果就買了很多冇用嘅嘢！
幪面超人忠粉 戴住面罩暴走日本
Q6︱對日本動漫熱愛到怎樣的地步？
我喺日本真係心口有個勇字，比起在泰國更瘋狂的，是試過戴住幪面超人面罩周圍去影相！當時去東映太秦映畫村花咗好多時間同心力，本身住在大阪，先要搭車去到京都，再轉的士先去到，我仲要不顧廉恥地帶件怪獸衫去，扮怪獸要店員幫我影相！
仲有一次幪面超人45周年紀念，在涉谷Parco 商場有展覽，為了這個展覽，我專登由泰國飛去，著怪獸衫、戴面罩去會場影相。當年扮演超人2號的男演員開了一間居酒屋，我同朋友慕名一齊去，除咗搵佢簽名，又戴住面具同佢合照，回想真係好瘋狂。
Q7︱你會推薦去日本一定要去哪個地方？
秋葉原有個叫萬世橋的地方，橋下面有好多賣文青東西的店舖，上面有間餐廳在火車站上蓋，我已經去了3次。坐在餐廳外的玻璃屋，左、右及前面三邊，可以同時見到有火車經過，無論日與夜去，都非常震撼同過癮！為咗可以影一張浪漫的相，我試過早上10點鐘去等，點知11點才開門，當時外面非常凍，但我為了可以見到呢個靚景，死企喺出面唔願走！最後就超開心，可以不停自拍，影到好多相。不過，如果大家想去，都係揀夏天好啲！
愛店一訪再訪 最愛仍是泰國
Q8︱泰國同日本 你比較喜歡哪個地方？
始終都係泰國，日本對於我來講，係適合shopping 的地方，但唔適合長住。冬天3點就感覺開始黃昏，5點天黑，但你早上早出門又冇嘢行，店舖未有咁早開，全日可以玩的時間唔多。之前去日本買相機，店員不停遊說我買腳架，我冇幫襯，一落樓發現鏡頭花了，上去再搵店員幫手，點知佢話：「今次就幫你整啦！但你唔幫我買腳架，你下次唔好再嚟喇！」那次令我感覺非常不好。不過，我又覺得每個地方都有陰暗面，對於我來說，東京真係一個購物的好地方，絕對會一去再去！