【洗肚臍方法】傳聞洗肚臍時，一個唔小心用力咗少少，就會搞到肚痛，加上唔知應該點洗，更加搞到懶得洗。但其實，如果唔理嘅話，細菌繁殖嘅數量會多到嚇死人！一齊睇睇專家教路，要如何清潔肚臍！
撰文：Carmen｜圖片來源：網絡
洗肚臍會肚痛？
細個時，曾經被長輩鬧唔好亂咁搞個肚臍，因為會搞到肚痛。點解會有呢個講法嘅呢？
因為肚臍同內臟之間，只相隔薄薄一層皮膚，過於用力搞個肚臍嘅話，會對腸臟造成刺激，繼而引發疼痛，過於劇烈摩擦，更有可能導致發炎！
肚臍嘅細菌多過廁所板？！
曾經有個研究，採集60人份嘅肚臍污垢進行檢查，發現咗2,368種種類嘅細菌！當中更有1,458種係新品種！
棲息於廁所裡嘅有害細菌約有290種，隱藏於肚臍內的細菌卻有約120萬種！有機會比廁所污糟足足約4,100倍。
肚臍污垢主要來自塵埃、汗、身體乳液等等。如果置之不理，細菌繁殖後，可能會引發炎症，或者發出惡臭！
肚臍嘅清潔方法
日本專家岡田明三老師就話，洗澡前，喺肚臍上塗層油就得。橄欖油等食用油又得，BB油都得。塗油會令肚臍內嘅污垢浮起，更容易清理。
將油倒進肚臍，約8成滿，等5～10分鐘，令油浸透到污垢中。又或者可用沾滿咗橄欖油嘅棉花棒，輕輕擦拭肚臍，待污垢變軟後，可用鉗子等將污垢去除。注意唔好咁用力呀！
