撰文：Carmen｜圖片來源：《しゃべくり007》
10種會令女性心動動作
節目整合咗10種會令女性心動嘅動作，分別為：（第一行左起）靠肩、用手指堵唇、牽手插褲袋、捲手袖、手臂衝線帶、（第二行左起）額碰額、我的外套、窗簾之刑、外套雨傘、轉椅子。節目主持成員們會揀選幾個動作，然後同竹內涼真進行小劇場，演繹畫面。
1｜牽手插褲袋
日文語源：ねじポケ
指約會時，男方牽著女方的手，然後自然地放進褲袋。日本女生指呢個動作有種在寒冷天氣底下被保護嘅感覺，能感受到男方嘅溫柔。（天氣愈凍，愈有心動效果！）
實演小劇場背景設定：2人為打工地方嘅前、後輩關係，女方（原田泰造）被設定為38歲，已對戀愛近乎放棄狀態。故事設定為2人喺寒冷天氣下到遊樂場玩。
雖然未到重點畫面，但涼真呢句：「我可以抱著『約會』的心情去玩嗎？」已經非常令人心動啊！！飾演女方嘅原田泰造都表現得不知所措（笑）。
一提起手就牽走對方嘅手，一系列動作太自然！
故事發展來到排遊戲會排好耐，涼真問完女方咁凍O唔OK之後，就自然地將牽著嘅雙手插入自己褲袋！！不得了！！
連扮演女方嘅原田泰造都話覺得心動！
2｜手臂衝線帶
日文語源：腕ゴールテープ
指2人吵架，然後女方打算離開時，被男方用手臂阻擋去路。因形式似跑步衝線，於是有個咁嘅別稱。日本女性更指，被攔後，從背面抱著會令心動感更加強烈。
實演小劇場背景設定：女方（福田充德）被設定為32歲，係涼真嘅經理人，而涼真對佢有好感。2人就涼真上節目後嘅表現吵架，經理人嬲到打算離場，然後就被涼真一臂攔住！！
攔完最後再加個環後抱……太犯規了！！！連飾演女方嘅福田充德都恍晒神（笑）。
3｜轉椅子
日文語源：椅子クル
指將辦公椅等椅子轉動，強行令對方面向自己。日本女性表示，經常妄想嘅畫面就係喺深夜office裡面加班，然後被可愛嘅後輩咁樣對待。
實演小劇場背景設定：涼真對女方(有田哲平)有好感，加完班打算走時，見女方仲未做完工作，半哄半強行地叫對方一齊走，邀請對方去飲一杯。仲話最多第二朝早啲返工幫女方清工作！
4｜捲手袖
日文語源：袖クル
指於洗手或煮飯時，男方從女方身後以環抱式幫忙捲起女方衫袖。日本女性話，從後環抱形式被如此對待，能夠感受到男方的壯闊身形同溫柔細心。
實演小劇場背景設定：女方（德井義實）被設定為33歲的女壽司職人，而涼真就係學徒。邊聽著前輩發牢騷，邊細心注意到對方手袖滑落，然後幫忙捲好手袖。（忍不住想說，呢種突然縮短身體距離感嘅做法拿捏得好好啊！）
