【 FlyJapan 】打工仔去旅行好有技巧，要夾盡天時地利人和先可以出走，為咗爭取時間玩多幾個鐘，唔少人會選擇搭夜機前往目的地旅遊。但有時去到已經係凌晨時分，乜車都冇，焗住要搭的士……喺日本搭的士起錶價已經好貴，坐多100米都心痛。明年3月起福音到！九州福岡市開始提供免費搭「的士」服務！
撰文：Carmen｜圖片來源：nommoc press release
日本九州福岡市2019年3月起免費搭「的士」
15歲起開始創業嘅最年輕社長：吉田拓已（今年22歲），宣布喺2019年3月開始，將開展日本首例嘅免費乘車服務。使用者可透過專屬手機app「call車」，車內設有顯示屏，展示店舖或商品等情報。作為「行走的廣告塔」，車費（運行成本）將會由廣告商支付，使用者可享受免費乘車服務。
提供服務嘅新公司「nommoc」，隸屬年輕社長吉田拓已所創立嘅，負責大型活動影像演出嘅公司7sense。新公司將透過由日本cloud capital營運嘅，提供股票投資型眾籌服務（crowdfunding service）嘅FUNDINNO，以目標金額5,000萬円開展服務，本月12日起接受申請。
免費乘車服務由公司同名「nommoc」營運，以福岡市最繁榮嘅地點，天神為中心試行服務，試行期間約提供10輛車輛。目標於開辦東京奧運會嘅2020年，推行到東京等主要城市。亦有推行到海外地方，如新加坡等地嘅計劃。
具體使用方法同Uber類同，透過專屬手機app進行車輛配對。由於使用者嘅資料會經由app傳送到終端，所以使用者喺搭車時，車內嘅廣告顯示屏會播放使用者感興趣嘅資訊，如潮流品牌或午餐推介等。
Tags :
福岡
