【西瓜減肥】夏天想減肥，但天氣又太熱唔想郁，最好就梗係食住瘦啦！日本節目《得する人損する人》就介紹咗一款西瓜減肥餐單！食飯前一碗特製西瓜粒，可保持自己一貫嘅飲食量，都依然可以減到肥！睇睇要點調製西瓜「瘦身食法」。
撰文：Carmen｜圖片來源：《得する人損する人》
藝人嘉賓真人測試
兩位藝人嘉賓Hana同Shoko出道5年，由原本嘅53kg同52kg，增加至63kg同67kg！
2人話年輕時就算暴飲暴食，第二朝體重都會自行回落，但近年新陳代謝減慢，而暴飲暴食嘅習慣依舊持續，所以體形維持唔到。
節目於是推薦咗「西瓜減肥法」畀佢哋！西瓜含有提升新陳代謝嘅效果，可以有效瘦身。
西瓜含有大量Super Amino同瓜氨酸嘅成分，能夠令血液運行狀況更好，使新陳代謝活躍起來。
另有嘉賓話懷孕後期，為咗唔好畀自己係咁食嘢，於是就食西瓜嚟壓抑食慾。即使有效都好啦！始終都係懷孕中，就唔好食咁多生冷嘢啦！要食都記得先諮詢醫生意見呀！
西瓜+黃豆粉就減到肥？
呢個餐單好簡單，就係喺西瓜上灑上黃豆粉一齊食！比用鹽送西瓜更加有提升新陳代謝效果！
因為西瓜嘅瓜氨酸一遇到黃豆粉中嘅精氨酸，就會產生一酸化窒素。
一酸化窒素可有效使血管膨脹，令血液流動嘅狀態更佳，從而提升新陳代謝。
咁一日要食幾多先夠？每日食400g西瓜+30g黃豆粉就夠。
食用時的2大重點
第1個食用重點係，喺晚飯前食！
夜晚食可以促進成長荷爾蒙嘅分泌，喺睡眠時，呢種荷爾蒙分泌得愈多，就更有燃燒脂肪嘅效果！
喺代謝狀態良好嘅時候睡覺，成長荷爾蒙嘅效果就會更好！
第2個重點係，唔好只食紅肉部分！其實白色部分所含嘅瓜氨酸係紅肉部分嘅2倍！
每日食，點都會厭啦！呢個時候就可以稍作餐單調整！
可將黃豆粉同味噌拌勻，然後將西瓜嘅白色肉切成幼條，再點黃豆粉味噌醬嚟食。
3個星期後測試結果，Hana一共減咗5.9kg，腹部減走咗14cm！
而Shoko則減咗5.7kg，腹部減走咗10cm！僅僅3星期，2人都減咗起碼5kg，睇嚟都幾有功效喎！
