撰文：Carmen｜圖片來源：《得する人、損する人》電視節目截圖
01｜青瓜
由米芝蓮2星級總廚野崎洋光師傅親自實踐過，總廚因經常要幫手試味，又因為店務繁忙，食飯時間好短，所以每次食飯都一口氣咁倒落肚。情況就有如要湊小朋友嘅家長，要清晒小朋友食剩嘅飯餸一樣，好多時候都默默食多咗好多嘢。野崎師傅就透過餐前一條青瓜，成功由68kg減到57kg！足足輕咗11kg！
青瓜所含的瘦身成分
據專家解釋，青瓜含有非常豐富嘅磷脂，而磷脂係減肥產品中不可缺少嘅最強瘦身成分。而磷脂有2種對減肥有顯著效果嘅成分：
效果1：提高新陳代謝（燃燒脂肪嘅能力）。
效果2：將食物中嘅脂肪進行分解、排出。
雖然亦有其他蔬菜都係含有磷脂嘅，但專家指，青瓜嘅磷脂含有量最多，分解脂肪嘅能力最強。
只需要每餐正餐前食一條青瓜，之後正餐無論食咩都完全OK！覺得只啃青瓜好悶嘅，仲可以蘸醬汁嚟食，咩醬都冇問題！
但同時要注意2個重點：
重點1：唔好煮，要生食！
因為磷脂一旦經過加熱，會減弱減肥效果。
重點2：每一啖都咀嚼20次或以上！
充分咀嚼食用，可更有效率地吸收磷脂。
之但係⋯⋯餐餐咁食法，好難唔悶喎！為咗令大家可以繼續食落去，野崎師傅仲製作咗2款食譜添呀！
青瓜味噌漬
以平常嘅做法，整漬物至少都要半日，而野崎師傅嘅食譜只需4小時就可以完成！而且做法十分簡單！
做法：將100g味噌+30g原味乳酪混合，然後放入用鹽洗刷過嘅青瓜，用密實袋裝好後，放入雪櫃浸漬4小時就完成喇！
師傅話因為味噌同乳酪一樣都係發酵食品，所以整漬物時，可以有效減少所需時間。
乳酪味噌湯
整完頭先個漬物，青瓜就食完啦！咁啲乳酪味噌要點處理？師傅就話可以直接攞去煲味噌湯！有別於一般日本味噌湯咁要整埋個高湯，師傅表示，所有食材都會成為高湯嘅一部分，飲落味道同一般味噌湯無異。
雞肉綠醋青瓜蓉
做法：首先將一條青瓜磨成蓉，磨蓉可以令酵素容易活動，而磨蓉後隔出嚟嘅青瓜汁，千祈唔好倒咗佢！可以加適量蜂蜜，當蜜瓜汁咁飲！
然後將青瓜蓉放到雞肉上，而因為雞胸肉係精力嘅來源，同青瓜配合仲有更好嘅效果！雞肉含有嘅精氨酸同樣有燃燒脂肪嘅效果。其他同樣有效果嘅食物仲有：豆腐、金槍魚、味噌。放上青瓜蓉之後，澆上柚子醋同麻油就完成！
藝人親身驗證3星期減肥結果：
女藝人福田明日香試行3星期之後，體重由原本嘅43.2kg，減到40.7kg，腰圍由74cm減至64.5cm，足足幼咗9.5cm！
02｜蕎麥籽（そばの実）
另一位米芝蓮星級大廚橋本幹造師傅表示，餐前食一匙蕎麥籽，就可以喺唔做運動、唔限制飲食嘅情況下，輕鬆減去8kg！
蕎麥籽所含的瘦身成分
蕎麥籽含有一種稱為阻抗蛋白質（Resistant Protein）嘅蛋白質，能夠抑制脂肪嘅吸收。一般而言，脂肪會被膽汁酸分解吸收，而阻抗蛋白質就有妨礙膽汁酸行動嘅作用，阻止脂肪吸收及有效排出體外。唔止減肥，蕎麥籽仲有預防高血壓嘅效果。蕎麥籽含有蘆丁同膽鹼成分，膽鹼更有預防脂肪肝等效果。
處理方法：
1）浸水1小時。
2）用小火～中火煮15分鐘。
3）沖水洗走表面黏滑就完成！
浸水還原後，可放雪櫃保存3日，但記得唔好一次整得太多呀！
都係嗰句，即使只係餐前食一匙，食多咗都會悶嘅！又係時候睇下大廚會點烹調啦！
山藥泥蕎麥籽
做法：喺500cc清水中，加入100cc料理酒＆100cc淡口豉油，然後倒入鰹魚碎，開火煮至微滾，約60～80℃就可以隔渣。喺3湯匙分量的蕎麥籽上放一層山藥泥(約半條日本長芋)，最後倒入高湯就大功告成喇！
日本長芋嘅效果：
1）長芋含有豐富嘅鉀成分，可以排出身體內多餘嘅鹽分，有助去水腫。
2）含有同食物纖維相似嘅成分，可有助改善便秘問題。
藝人親身驗證3星期減肥結果：
由2位體重加埋超過200kg嘅搞笑藝人Donguri Powers嘅Minako同Aiko進行試驗，Minako由105.6kg減至98.8kg，Aiko則由106.2kg減至99.7kg！腰圍分別減咗9cm同7cm！實在太勵志喇！
03｜洋蔥乳酪
節目以前曾經介紹過嘅超人氣食法，對通便非常有成效！但網絡上好多聲音表示對味道厭倦，所以今次就由星級大廚稍加調整，製作食唔厭嘅dressing風乳酪。
洋蔥乳酪製法：洋蔥1個＋無糖原味乳酪200g＋鹽 1/2茶匙
1）將洋蔥切至薄片，靜置約30分鐘。
2）將200g無糖原味乳酪同1/2茶匙鹽加到洋蔥片中。
3）充分混合後就完成！
可直接食用，亦可放雪櫃一晚後再食，洋蔥會變軟且更易入口。整完1次後，2～3日內要食完，每日大概食50g。
大廚調整後新製法：洋蔥乳酪200g＋淡口豉油2湯匙＋檸檬汁1湯匙＋白芝麻2湯匙，將所有材料混合好就完成！
洋蔥乳酪所含的瘦身成分
乳酪含有嘅乳酸菌能活性化腸內細菌，腸內細菌會吃掉洋蔥所釋放嘅菊糖，從而產生短鎖脂肪酸，呢種就係現時魔法般嘅最新減肥物質「瘦酸」。
短鎖脂肪酸嘅效果：
1）活性化腸臟活動。
2）提高新陳代謝。
3）抑制脂肪吸收。
4）抑制食慾。
甜品版洋蔥乳酪：洋蔥乳酪50g＋蜂蜜 適量＋檸檬汁 少許，攪拌混合後，放到多士上，可製成法式多士風甜品！
藝人親身驗證3星期減肥結果：
女藝人井上咲樂進行3星期減肥試驗後，體重由46.6kg減至41.1kg，腰圍由74cm減至62.5cm！足足輕咗5.5kg！腰圍仲瘦咗11.5cm！
