撰文：Carmen｜圖片來源：株式会社AMF、網絡、相關機構
JC．JK流行語大賞2018年上半期結果
呢個調查係由擅長探索潮流嘅「JC．JK調查隊」搜集而成嘅結果，分為「人物」、「物品」、「app」、「詞語」4個部門。結果及解釋如下：
【人物部門】
第1位：今田美櫻
剛結束不久嘅上季日劇《花過天晴～花男next season》中，今田美櫻所飾演嘅角色，髮型設計使用咗絲帶綁成超可愛嘅雙馬尾，造成日本女生之間嘅熱爆話題。喺運動會、特別活動等中模仿呢個綁法嘅女子高中生非常之多！
第2位：BTS 防彈少年團
韓國Big Hit娛樂經紀公司旗下7人男子團體，2013年於韓國出道後大紅！2014年開始進軍日本，引來超高關注度。呢一、兩年都依然能頻頻於日本電視節目上見到佢哋嘅身影。BTS防彈少年團成員包括：Jin、SUGA、j-hope、RM、Jimin、V、Jung Kook。
第3位：King & Prince
日本Johnny’s事務所旗下新6人偶像團體，於2018年5月23日正式CD出道。出道單曲首日銷量達31.8萬！歌曲〈Cinderella Girl〉是成員・平野紫耀主演日劇，《花過天晴～花男next season》主題曲，爆紅到日本街頭幾乎每走過一處都能聽到店家在播嘅程度。King & Prince成員包括：平野紫耀、永瀨廉、高橋海人、岸優太、神宮寺勇太、岩橋玄樹。
第4位：BLACKPINK
韓國YG娛樂旗下4人女子組合，於2016年韓國出道，憑出道單曲打破多項新人組合紀錄。2017年開始進軍日本，但正式於日本出道前，在日本武道館舉行首場海外showcase，高達20萬名歌迷透過各種渠道，向其所屬公司表達購票請求，於日本也擁有大量歌迷。BLACKPINK成員包括：Jisoo、Jennie、Rosé、Lisa。
第5位：けみおKemio
以日本女高中生的支持為主嘅日本超人氣YouTuber，其「獨特世界觀」獲得年輕人嘅壓倒性支持。現時22歲嘅Kemio，父親係意大利+伊朗混血，母親為日本人，父母因事故雙亡後，由祖父母養育成人。曾於6秒影片app「Vine」投稿，出名後做過歌手、演員、model。現時居於美國，以YouTuber身分活躍中。
【物品部門】
第1位：芝士熱狗
來自韓國嘅食品，因為影相放上Instagram畫面感夠吸引，成為咗流行第1位！特別係新大久保嘅「Arirang Hotdog」人氣最高，芝士拉伸嘅畫面有非常多朋友、情侶影相合照，喺年輕人之間極具人氣。
第2位：貢茶
喺日本，貢茶特別出名嘅原因為茶香同珍珠嘅口感。一入口就有滿滿紅茶香，而且珍珠都非常講究。貢茶嘅珍珠柔軟，口感良好，係高人氣嘅原因之一。除此之外，因為可以自由選擇飲品配搭，所以喺年輕人之間相當有人氣。
第3位：STRAWBERRYVERYMUCHFRAPPUCCINO
被稱為Starbucks史上最強士多啤梨星冰樂，整杯不使用牛奶，士多啤梨亦不做加熱處理，而且無論飲到第幾啖，都充滿濃厚嘅士多啤梨味。士多啤梨嘅使用量多到令人認不住感嘆：「係咪over咗？」
第4位：オオカミくんには騙されない（不會被大灰狼君騙倒）
2017年開始於網絡電視，AbemaTV播出嘅日本真人騷節目。以「真心想要戀愛嘅女子高中生」為主人公，透過反覆同男性陣容見面、約會，追拍到直至陷入戀愛嘅「戀愛紀錄片」節目。2018年被選為「女子高中生票選「最喜歡的戀愛真人節目」第1位。
第5位：腰包
日本衣著潮流的一環，斜孭或掛腰間都係受年輕一眾歡迎嘅潮流。
【app部門】
第1位：荒野行動
由中國網易遊戲公司開發嘅第三人稱射擊遊戲。玩法簡單，連冇乜打機經驗嘅玩家都能享受遊戲，所以喺年輕人間非常受歡迎。而喺遊戲裡面，勝出就會獲得朋輩間嘅人氣，亦能得到女生嘅支持。
第2位：Tik Tok 抖音
抖音於2016年9月開始應用，至今已成為中、港、日三地非常多年輕人使用嘅音樂社交軟體。
第3位：Peing -質問箱-
首先製作一條URL，然後公開放到社交媒體平台上，可供follower匿名向玩家提問問題。玩家唔會知係邊個人問，回覆時，更會自動將問題變成一張圖片，玩家就可以轉到自己Twiiter帳號，或其他社交平台回答問題。
第4位：Netflix
於世界多國提供網絡隨選串流影片嘅公司，1999年開始推出訂閱制服務，至今已提供超過10萬部電影DVD，訂閱者人數超過1,000萬人。
第5位：IGTV
Instagram新服務，用家可upload約1小時嘅影片，而解家頁面則稱為「頻道」。
【詞語部門】
第1位：「あげみざわ」
由【人物部門】人氣第5位嘅YouTuber Kemio始流行嘅「あげみざわ」，帶有情緒高漲嘅感覺，最原本用於表達情緒高昂嘅字詞係「あげ」→「あげみ」→「あげみざわ」，透過呢個進程慢慢演變而成。多用於表達情緒高漲，或表現開心時用到，例如「テスト終わった～あげみざわ～」（測驗結束啦～好開心啊～）。
第2位：「あざまる水産」
係最新版嘅「ありがとう」（多謝）潮語說法，由「ありがとうございます」（標準說法）→「あざっす」（省略版）→「あざす」（再省去促音）→「あざまる」（まる有圓形意思，這裡則表示句號）→「あざまる水産」（まる同指句號，後面加上水產係因為讀音上與磯丸水產的日語發音相似）。大概今後會流行企業名(商品名)x詞語嘅合成潮語。
第3位：「ないたー」
呢個都係由Kemio帶起嘅潮語，字面有「泣いた」（哭泣）嘅意思，但唔係悲傷嘅時候先用，咩情況底下都可以用。
第4位：「クセがスゴい」
來自日本漫才藝人・千鳥Nobu嘅段子「クセがスゴい」。主要指習慣、冇意識嘅行為太過有特徵，令人忍不住感嘆「實在太有特色」！比起普通嘅表達方法，模仿Nobu嘅抑揚頓挫嚟講，更受高中生歡迎。