撰文：Carmen｜圖片來源：星野リゾート、《林修のニッポンドリル》
享受最高級日式招待
星野旅館連續2年蟬聯住客滿意度調查第1位！分有「虹夕諾雅」嘅頂級豪華旅館、「界」嘅精品溫泉旅館、「RISONARE」嘅時尚度假村同「OMO」嘅都市觀光酒店等4大系列旅館。喺香港人之間較為出名嘅，相信就係位於輕井澤嘅「虹夕諾雅」豪華旅館喇！
星級服務即係點高質法？
日本綜藝節目《林修のニッポンドリル》追訪咗星野旅館，「虹夕諾雅」東京分館嘅「神級」接待服務，簡直貼心到令人感動！旅館總負責人就話，集團廢除咗接待指南，所有職員係根據同客人間嘅談話同觀察，自己思考提供咩服務畀客人最好，實現日本茶道中所體現嘅「主客一體」精神。
例子：
1：房內check-in
目的係令住客舒舒服服咁，放低晒所有隨身物品，先再進行check-in。女嘉賓激讚呢份細心，如果湊住小朋友去，簡直係幫大忙，可免除小朋友因「扭計」或嬉鬧而造成嘅尷尬。
2：勁貼心！超班照顧
從談話得知住客有花粉症，喺住客要求追加紙巾嘅同時，考慮到喉嚨會唔舒服，攞完紙巾之後，居然仲攞埋蜂蜜同花果茶畀客人！你以為咁就完喇咩？仲有呀！職員甚至準備埋空氣清新機，同king-sized垃圾桶畀客人！
3：連住限定！換房間setting
對住多過一晚嘅客人，職員喺住客外出後，執房時會觀察住客嘅習慣喜好，從而改變房間內嘅擺設，令住客住得更舒服方便。例如見住客鍾意觀星嘅，就將梳化移至合適嘅角度；見客人帶好多書嚟嘅，就攞埋book stand畀你，但大前提係職員唔會移動住客嘅私人物品。即時好有王子公主嘅feel呀！
5月9日開幕 新落成平價酒店
回到正題，星野集團最新酒店，OMO5東京大塚即將於下星期開幕，客房一人一晚大約7,000円起。最大特色為客房「YAGURA ROOM」(檜木)，雖然細細間，但設置咗好多立體多功能家具，而且用上咗高床架寢具，呢度隱藏咗星野旅館嘅貼心。
使用高床架嘅原因係，直到住客入睡前，都能保持乾淨床鋪。床架下有個梳化區域，確保住客外出玩完返嚟，有位置放「戰利品」同休息，唔使扔晒啲嘢上床整污糟床鋪。
餐廳及大堂
地道導遊
OMO5延續星野旅館一貫嘅好客之道，為咗令住客可以充分體驗所在地嘅魅力，組成咗「OMO戰隊」，每日喺Go-KINJO Map上研發唔同路線，夜晚帶你出去體驗當地最地道嘅美食、美酒同特色活動。（*KINJO日文指鄰近。）
詳細資料：
Hishino Resorts OMO5 Tokyo Otsuka
地址：東京都豐島區北大塚2-26-1
官方網頁：omo-hotels.com/otsuka/ch/
價格：7,000円（每人每晚）
房數：125
Check-in 3:00pm， checkout 11:00am
最新的日本入境要求詳情？
在入境日本前，建議先用Visit Japan Web完成一部分檢疫手續，便能更快速地入境日本，即睇使用教學，例如註冊步驟及同行家人如何填寫等，以及買定日本電話卡。