【日本100円店】日本旅遊指定動作！去100円店掃貨！一間店閒閒哋都有過千種產品，咩先至係真正值得買呢？平還平，都係錢嚟嘛！睇睇日本達人推薦，3大長年熱賣人氣產品，同4款新出超方便產品，下次掃貨就唔怕買咗一堆冇用嘅嘢返嚟啦！
撰文：Carmen｜圖片來源：《ヒルナンデス！》
必買！日本100円店Best 7人氣產品
1｜DAISO Nail Kiss
2000年發售，至今18年都依然係超搶手人氣便利產品！卸指甲油時，一般方法都係用棉花+卸甲水，費時又搞到啲棉花甩到周圍都係！
Nail Kiss只需3秒就能將指甲油卸得乾乾淨淨！一推出就大受歡迎！試過因為太賣得而一時停止出貨。咁高質素都只係賣100円，絕對係入貨首選呀！
2｜CanDo 便攜去污筆
2018新發售產品，筆頭有清潔劑成分，細細支非常方便帶出街，出街食麻辣都唔怕食到成身辣油啦！
3｜CanDo 塑膠製兔子形開瓶器
熱賣超過10年！係登上過日本雜誌嘅傳奇產品。據達人所講，呢個開瓶器係無論幾緊嘅樽蓋都可以輕鬆扭開嘅製品，平得嚟非常有實力，CP值超高！
細樽蓋可善用兔仔耳嘅部分打開，設計性佳。
4｜DAISO 便利攪拌器
2018年新發售產品，簡直係懶人一族必備的廚房工具！只要按壓前端就會轉動，對於一眾放工後仲要煮飯嘅媽媽嚟講，可以大大省略時間之餘，仲可以慳番手臂嘅力！
使用方法簡單又快捷，連小朋友都可以安全使用。有咁好玩嘅工具，以後就叫得郁小朋友幫手準備晚飯啦！
5｜DAISO 萬能去芯匙
2018新發售產品，無論咩size，都可以靠呢隻有鋸齒嘅匙嚟輕鬆切走芯/蒂！唔使再用菜刀咁危險！
切走椰菜芯，再喺芯位放入浸咗水嘅脫脂綿，就可以延長保存期。
可以移動保護套調整刀刃長度，fit番蔬菜芯嘅大小。
6｜CanDo Orange Peeler
2001年發售嘅超人氣長壽產品！對於鍾意食柑橘類水果嘅家庭嚟講，係必備工具！
使用方法係用尖嘴位置嚟割開厚硬果皮，可以避免果汁四濺之餘，還可保持果肉外形。
7｜DAISO 雞蛋花紋切割器
2018年新發售產品！對於鍾意帶飯嘅一眾打工仔嚟講，可以用最簡單嘅方法嚟令飯盒更加繽紛，食慾都大增啦！