距離日本蠔季完結時間不遠，以為3月以後かき小屋（蠔小屋）就通通閂門？若還未來得及請假、買機票，錯過10-3月出發，其實日本部分蠔小屋都會全年營業，海鮮迷一樣四季都有平價鮮蠔可吃。但講到至抵，在宮城縣松島的「松島さかな市場」就可以￥2,000/HK$133， 任食燒蠔 45分鐘！
text：yuki@港女講旅行 photo：him
5星綠提燈！狂食100%真﹒日本蠔
松島沿岸蠔穫豐富，一年四季皆有蠔可吃。除了松島海岸駅前的蠔小街，相距10分鐘路程的「松島さかな市場」主要出售產地直送的新鮮海鮮，另有不同的海鮮小食，包括海鮮丼、壽司、燒物等等。但最吸引的，絕對是市場旁邊的かき小屋（蠔小屋）的燒蠔放題任食！
店家唔小氣 每人吃超過廿隻燒蠔！
一入店內蠔香已經撲鼻，店員早已經在我們的位置上放了一座燒好的蠔山。急不及待埋位打開有手掌大的蠔殼，雖然蠔肉身形較小，但勝在口感柔滑，味道濃厚，燒過之後特別香口。食到一半，店員更自覺用鐵鏟送上一堆又一堆鮮蠔，唔怕店家小氣，最怕冇多個胃狂食咋！45分鐘任食時間，我們每人吃了超過廿隻燒蠔，回本有凸！連附送的鮮蠔味噌湯和鮮蠔蒸飯，￥2,000/HK$133就可以食到日本蠔，絕對物超所值。
$100唔使！滿瀉三文魚子丼
專誠來到「松島さかな市場」，單食一餐燒蠔又怎會滿足。貢入旁邊的魚市場走一圈，已經叫我這個刺身控胃口大開。魚市場由當地漁業公司直接營運，捕魚、入貨、出售一手包辦，不時都有超低價益街坊，平食海鮮不是夢。秋季限定的放題三文魚子丼，價錢只需￥1,300/HK$94，我們下晝1點來到仲食到！
滿到瀉！唔叫停唔停手
上枱時，店員仲一大羹一大羹加，唔叫停唔停手，極之豪爽。他們採用東北的氣仙沼市產的三文魚子，粒粒卜卜脹，入口非常鮮味。過了秋季限定期，都唔使失望，平日超足料的三文魚子丼亦不過￥1,100/HK$79。面對眼前即時鮮，我全部都想食晒入肚！
