text： Cynthia｜photo：LIHKG截圖、新傳媒資料庫｜資料來源：LIHKG
01 | 萬能的便利店
去過日本一定會同意，日本便利店真係好完美，關東煮、溏心蛋、Lawson炸雞、飯糰，樣樣都非常好食！每次日遊都一定會帶勁多食物返酒店做宵夜，又平又高質！
唔少網友都話，返到香港之後去便利店買嘢都要望下價錢，選擇少都算啦！仲要買咩都有種中伏感，勁難食仲要勁貴！
02 | 溫暖的廁板
日本的廁板真心好服務，可以洗屁股，仲會暖笠笠，冬天去到一坐低，成個人都會暖晒！至於香港嘅廁板有幾凍，相信大家最近都體會到，坐上去嗰一刻，簡直會凍到想彈起身！
除此之外，商場廁所的乾淨程度都好大分別，日本廁所非常乾淨，而且地下好乾爽，唔會濕淥淥！
03 | 食物有質素
有網友就覺得，香港雖然嘢食多，但冇樣精，小食方面周街都一式一樣，而且間間都係連鎖式，想食啲特色小店都要搵搵！相比之下，日本廚師對食材的認真已經完勝！
不過都有網友為香港平反，話喺日本唔食拉麵、燒肉、壽司、炸物就冇啖好食！而且香港煮法多，各國嘅料理都可以食到！美食呢樣嘢，真係各花入各眼啦！
04 | 日本限定好吸引
雖然好多日本品牌都已經喺香港買得到，但好多產品都係日本限定，香港買唔到！好似Häagen-Dazs限定口味非常吸引、可口可樂新出桃味，又或者合味道的新出款等等，都只可以喺日本買到，所以去旅行一定要大掃貨！
05 | 服務業有禮貌
相比之下，好多網友都認同日本人好有禮貌，行入一間店舖，無論你買唔買嘢都會好好笑容，唔似香港一話「自己睇下先」就勁黑面！
06 | 天氣較宜居
日本的天氣都比香港好很多，香港夏天又熱又焗，冬天就勁濕凍，加上空氣污染愈來愈嚴重，難怪好多人都會有皮膚過敏、鼻敏感等問題。
相比之下，日本的冬天屬於乾凍，冇咁辛苦，而且比較乾爽！好多人一去到日本，皮膚就立即好咗，無論幾凍都唔會起濕疹，連上妝都比較貼服！
07 | 冇人邊行邊食煙
喺香港好多人都會一路行一路食煙，不幸行喺煙民後面就要硬食二手煙，而且點避都避唔到！
日本煙民就會自己去吸煙區食煙，好多車站、商場都會設吸煙區方便煙民，唔會咁易臭到人，更加唔會邊行邊食，好有公德心！
08 | 地鐵車廂乾淨又靜
坐車的時候唔會有人大大聲講嘢，非常靜，而車門開了之後，會耐心等入面的人先落後上。
09 | 列車指示清晰
好多遊日的旅客都會覺得，日本的地圖超級複雜好難睇！但有唔少網友就大平反，話列車資訊牌好清楚，寫晒地點、第幾卡、月台號等等，完全唔難搵！
10 | 機舖選擇多
有鍾意打機的網友就分享日本機舖相比之下選擇多好多，機種比香港齊全，有TAITO、ROUND ONE 等，仲會喺機旁放條毛巾，可以抹乾淨再畀下一個人用，又或者會供應濕紙巾，夠晒貼心！