日本電車禮儀：車內能否進食？
之前有香港網友去日本玩，因為搭電車時食咗條百力滋，便被日本人提點車廂內不准飲食。呢件事引起網友們嘅關注及討論，明明冇明文規定，點解又會被其他乘客話？喺電車內飲食其實需要注意啲咩？
日本JR鐵路公司 對車廂內飲食的回應
早於2017年，就有日本網友因為有人喺電車內食味道強烈嘅食物，而直接問過JR鐵路公司，而JR嘅回應係「目前尚未制定禁止車廂內飲食的規則」，網友便理解為係允許進食。
不過與此同時，卻有一條曖昧嘅規定：「禁止為他人造成困擾的行為」，即係若有人認為車內飲食係打擾到周邊人嘅話，就不得不對此作出對策。咁⋯⋯應該要點樣判斷手上嘅食物能否於電車上進食呢？
日本網友：食飯糰都唔好
有日本網友猜想「三文治、飯糰呢種程度就應該冇問題」，不過都要睇下餡料傳出嘅味道是否強烈。網友指，曾經見過有人喺電車內食啲好難以置信嘅食物，例如牛肉飯、便當、蕎麥麵、杯麵、麥當勞及pizza，而且仲好悠然咁喺電車內慢慢食。
有網友回應，能夠一口食完嘅話就冇問題，但如果要超過一口先食得晒嘅食物，就應盡量避免，例如香口膠、糖、獨立包裝嘅朱古力都可以，但飯糰、麵包或三文治呢啲就無法接受。
日本人又點睇？
2014年曾經有一個「關於電車內飲食」嘅調查，訪問咗500名日本人，認為「冇問題」嘅有91個人（佔18.2％），覺得「唔可以飲食」嘅有172人（佔34.4％），而「視乎場合而定」則有237人（佔47.4％）。訪問中，好多人對電車內飲食都表示不贊成，以下有一啲雙方意見例子。
認為電車內飲食冇問題嘅人認為⋯⋯
如果沒有溢出氣味的話，就不會造成困擾（31歲．女性）。
如果在趕著外出的時候沒有時間吃東西，在一定程度的常識上是可以的（27歲．男性）。
車站飯盒是為了在電車內進食而存在的，本來應該可以食，但TPO(時間、地點、場合)也很重要，如果是在擁擠的環境下，對別人造成困擾就不好了（39歲．男性）。
認為電車內不能飲食嘅人認為⋯⋯
對氣味和咀嚼時的聲音很在意，所以希望停止這種行為（24歲．女性）。
覺得會把灰塵也食進口裡，很不衛生（27歲．男性）。
令周邊的人困擾（29歲．男性）。
日本人又有冇試過喺電車內食嘢？
日本民營鐵道協會於2013年曾發表過「2013年度車站與電車內的困擾行為排行榜」，其中得到9.9％排第13位嘅，就係「曾於擁擠的電車內飲食」。而J-Town.Net於2014年11月6日-28日期間的23日中，曾就「在電車內飲食⋯⋯有？冇？」呢一個主題進行咗一個問卷調查，一共收到1,437人回答。
全國集計嚟睇，答「有」嘅人佔46.8％，而答「冇」嘅，略超於答「有」嘅人，共佔53.2％。答「冇」得票率最高嘅都道府縣為首都圈、名古屋、大阪、神戶、札幌、福岡等大都市居多。另一方面，答「有」嘅地區包括四國、九州、東海等地。
月台上點解會有便利店？
明明咁多人都覺得唔可以喺電車內食嘢，又或未試過喺電車內進食，但點解差唔多每個站嘅月台都有便利店呢？咁係咪即係可以喺電車內飲食？日本禮儀邊有咁簡單！即使有便利店，都唔代表可以喺電車內飲食，呢間便利店其實係畀使用者於月台等車時，或者喺等候室時食嘅。
冇明文規定=可以食嘢？
咁多人都話車廂內不應飲食，咁點解唔寫到明？咁係因為日本好多人都好自律，而且都好注重禮儀。佢哋認為禮儀等同於一般常識，而一般常識係唔需要寫出嚟，大家都會自律遵守。
唔係去到好冇人性咁，連水都唔飲得，只要唔影響到其他人，其實食少少食物都係可接受嘅。加上日本人都好注重TPO(時間、地點、場合)，所以下次去到日本，要記得唔好買啲味道濃烈，或有機會影響到人嘅食物並於車廂內進食喇！
