【日本旅遊】去啲語言不通嘅地方旅行，最怕就係病，仲要係唔睇醫生唔得嗰種程度！尤其日本，大部分人都唔識日文以外嘅語言，溝通已經難，仲要講邊度唔舒服。為面對2020年東京奧運，日本富士通就研發咗醫療用翻譯機以解決呢個問題！以後去日本玩嘅時候唔小心病咗，都唔使再怕冇醫生睇喇！
撰文：Carmen｜圖片來源：FUJITSU
醫療用翻譯機
隨住近年訪日外國人人數增加，需要睇醫生嘅外國人患者亦都隨之增加，日本人認為多種語言嘅溝通支援係件好急切嘅事。有見及此，為咗將外國人睇醫生嘅求醫過程變得更順利，日本富士通研究所喺2016年開始，開發能辨認人嘅聲音，同說話者位置，毋須按任何掣，就可以自動切換適當語言嘅handsfree技術，減輕醫療負擔。
除咗特定嘅醫學用語，呢款翻譯機更可準確翻譯日本人常用嘅，用作表達痛感嘅擬聲詞。
翻譯機於2017年11月開始完成臨床實驗，喺大醫院嘅診室環境（60分貝噪音），醫護人員同患者面對面交談時，約80cm嘅自然距離中，對話嘅翻譯精準度達到95％。
目前提供日文、中文、英文嘅翻譯，以後將逐步擴大應對語言種類，同可使用範圍，希望將技術推至觀光或其他業務範圍。
醫療用翻譯機將於今年中，以面向醫療相關機構發售並投入服務，以後去日本就唔使怕同醫生你眼望我眼喇！