撰文：Carmen｜圖片來源：《ホンマでっか?!TV》
肌膚老化速度取決於UV吸收量？！
據日本護膚專家澤田彰史所說，肌膚表面嘅老化速度，8成取決於UV嘅吸收量，減少外出率，會對皮膚較好⋯⋯
唔曬太陽，又點吸收維他命D？專家就話，其實每日只需手心面積咁大嘅皮膚，曬10～15分鐘太陽吸收紫外線，就已經有充足嘅維他命D！
唔同年齡階層嘅美肌效果食品
01｜10～19歲
十幾歲嘅年齡，肌膚嘅煩惱多數為暗瘡，而暗瘡成因嘅其中一個原因係便秘！
專家指，便秘會令惡玉菌增加，繼而令活性酸素產生，隨住血流積聚到皮膚，形成暗瘡。而便秘嘅原因，大多數情況下，都係因為食物纖維不足。
能夠高效率地攝取食物纖維嘅食物就係芋絲！每300g芋絲就含有5～6g食物纖維。唔知點煮好嘅話，用芋絲取代一般麵條咁食就可以喇！
02｜20～29歲
踏入20歲，肌膚嘅主要煩惱都依然係暗瘡問題，而呢個年齡階層要消除暗瘡問題，最重要嘅做法係攝取維他命C。
專家就推薦食紅椒預防暗瘡。紅椒比青椒含有2倍多嘅維他命C，對美肌有唔錯嘅功效。
專家仲話，其實食水果對皮膚竟然係唔好㗎！因為果糖會令血糖值急上升，產生活性酸素，成為生暗瘡嘅原因。
03｜30～39歲
步入30歲，就漸漸變得不能夠勉強嘅時期，而原因係因為缺鐵！
鐵質吸收，好多人都會諗到食紅肉、魚，但原來吸收效率最高嘅係食肝臟。
鐵質不足就無法製造膠原蛋白，繼而成為皺紋、下垂嘅原因。
04｜40～49歲
進入40歲，代表住已經步入幾乎無法製造膠原蛋白嘅年齡。提到膠原蛋白，印象多為食魚翅，但專家指魚翅係高級食材，性價比好差，於是推薦食小白魚乾。
一日需攝取嘅膠原蛋白大約為5g，而小白魚乾就含有約22g！
以前有話即使食膠原蛋白，亦都唔會增加到身體內嘅膠原蛋白量，因為會被胺基酸所分解。但最近嘅研究就指，膠原蛋白中約有10％會作為膠原蛋白肽被吸收，能夠促進肌膚細胞活動。
05｜50～59歲
到50歲，肌膚嘅老化原因係腸內惡玉菌。最好嘅解決方法係由食物中吸取善玉菌作補給，而最有效嘅食物就係納豆。
但係生物學專家指，50歲後發生嘅食物過敏係好難痊癒嘅！所以要更小心注意飲食，記錄低食咗之後感到不適嘅食品，管理好身體健康。
化妝對皮膚不構成傷害？！
美肌專家指，其實化妝帶有一定防UV功效，對皮膚嘅傷害唔算太大，唔需要咁搏命去卸妝，卸唔乾淨都好，但一定要喺40秒內完成卸妝過程！喺沖緊涼時等有濕氣嘅環境下卸妝，係對皮膚最好嘅。