撰文：主場・日本 圖片：網上圖片、相關機構、新傳媒資料室
出post十日即吸4.2萬likes！
這位名為ヒュージ（HUJI）的網民，於12月10日在Twitter出post，至今已經有超過4.2萬個likes、3.4萬個retweet（即share），更引來不少網民留言討論！雖然建築物外觀被他自己形容似「卒塔婆」（即佛塔或舍利塔），但睇相都算正正常常，背後仲有無敵的雪山景，大廈內又有溫泉又有暖水泳池，7千蚊真係買到一個單位？係真唔係呀？
看大堂及溫泉的照片，感覺似大型的溫泉酒店多一點！
講都唔信！東京坐新幹線80分鐘就到！
咁抵買，香港人覺得一定會在「山卡拉」的地方，例如北海道或東北一帶較偏遠的鄉鎮，否則就一定係凶宅或有鬼！唔使擔心！有外觀的相，日本的網民當然即時起底，好快就check到呢棟大廈叫做「ライオンズマンション越後湯沢第3」（Lions Mansion越後湯沢第3）。越後湯沢？冇錯！就係香港人好喜歡冬天去滑雪的越後湯沢，由東京坐新幹線，最快80分鐘就到！
即刻睇，有冇7千蚊咁平！
如果你喜歡滑雪，係咪覺得好吸引呢？一年去滑一兩次雪都回本！因為當地附近的溫泉酒店，在滑雪季節每晚房租都起碼千幾二千蚊，不如自己買間住仲抵！於是我上網check價錢，發現最平一間要200萬日圓，即是約14萬港幣，雖然都算好抵，但卻未至於有衝動買啊！
泡沫經濟遺產
話說80年代中至90年代初，日本泡沫經濟的年代，全國各地都流行發展度假村，滑雪場及高爾夫球場愈開愈多，附近一帶當然是起樓起酒店，同時吸引了不少人買屋來做別墅！但隨著泡沫經濟爆破，加上大家對滑雪及打golf的熱情冷卻了不少，以湯沢町為例，有6成的別墅，屋主一年都不會住到一次！
冷知識：買滑雪場別墅，原來關〈Last Christmas〉事？
每年聖誕，無論在香港還是日本，在商場或是餐廳，都總會不停不停不停聽到Wham!的〈Last Christmas〉！明明是首講失戀的歌，但卻在普天同慶的日子日播夜播，聽到人心都煩！（不是嗎？）原來，日本人在80年代流行滑雪及在滑雪場附近買樓，其實〈Last Christmas〉都要負一點責任！話說這首歌在1984年推出，紅遍全球，而MV入面，就是以滑雪場及滑雪場旁的別墅做背景！
睇片：
