【日本熱話】日本政府對增加消費稅率一事檢討多時，安倍晉三首相終於喺今日嘅政府會議上表明，將於2019年10月1日起實施增稅措施，日本消費稅將由現時嘅8％增加至10％！但部分產品將實行「輕減稅率」政策，消費稅將凍結於8％。
撰文：C｜圖片來源：Nippon News Network
日本消費稅明年10月增至10％
自2014年4月由5％消費稅增至8％以來，日本政府公開表明2019年10月1日起，將消費稅再提升至10％！喺增加消費稅率嘅同時，亦會導入「輕減稅率」方案。除酒類、外食（餐廳堂食）嘅飲品及食品以外，其他外帶飲食商品將凍結喺8％稅率。
便利店商品又點計？
店面較大嘅日本便利店，唔少都設有桌椅等位置供客人食便當、小休等，增稅後，喺便利店堂食就會變為10％稅，但帶走嘅話就會係8％稅，咁應該點計呢？
便利店有桌椅嘅情況下，一係店方要明確標明「不准飲食」，實質上阻止所有堂食行為嘅話，除酒類要收10％之外，其他飲食商品都會沿用8％稅率；另一做法係店方允許店內堂食，但喺付款前，必須確認客人係要帶走，定係堂食，用以確認應該收8％定10％消費稅。出年年尾去日本就要留意喇！
