四國德島秘景處處，散布在高低落差極大山谷間的 祖谷 ，被秋風吹走長年縈繞的霧色煙霞，遍野盡是金黃艷紅的秋色秘景。多得德島交通不便，不少地方仍然保有最原始的風貌，在 祖谷 有全日本只剩3條的傳統藤蔓橋，腳踏男橋疏窿繩網過河，已嚇到腳仔軟回塘，有好多人唔知原來女橋旁，仲有架木製的隱世渡河轎，危危乎，拉到手軟先過河！
日本最後三條 藤蔓行人橋
架於 祖谷 溪上「奧祖谷二重かずら橋」以傳統藤蔓編建的行人橋，全日本只剩低3條，非常珍貴。二重かずら橋，即有二橋並列，又稱「男女橋」或「夫妻橋」，這條橋由木及藤蔓架結成，雖然因安全問題藤蔓已加鋼索，但行起來可直觀溪底，稍一不慎好似會跌落水，畏高者未必頂得順。望著橋底急流風光，耳邊配埋呼呼風聲，行完壯闊的男橋腳仔軟軟。
木製隱世渡河轎
既然女橋較短，唔行都得啫？ 如果你真係冇行多一點路入去女橋的話，那你就要大喊十聲死蠢！
拉到手軟似拔河
女橋過河，與別不同，橋旁有以人手拉、名為 「野猿」的木製渡河轎 。想搭野猿渡河先要付入場費，畀完錢，如入無人之境，穿過入口森林處，依指示走，很快就見那個以木製的渡河轎 。方形木轎，冇咩設計，睇落簡陋，彎腰坐入去，容納到2個女生，重少少的話，分車吧啦！一條粗繩，穿過正中央，要拉動架 渡河轎 ，好原始，拔河啦！拉拉拉，拼命拉，拉到去河中央，通常玉手都會軟晒，然後就會開始冒來自等待者的殺人目光，影相拍片打卡，實質是為雙手爭取休息的時間！
11月中旬開始的紅葉季，坐在轎內，看溪谷兩旁林蔭鬱鬱，吹落橙黃嫣紅層層相間的秋楓，靚到唔捨得走。
最後，過來人有個貼士醒你，如果有男生同行，記得叫佢過先，那就可以叫他幫手在對岸拉你過去！
奧祖谷二重かずら橋
地址︰三好市東祖谷菅生620
收費︰大人550円/HK$42 小童350円/HK$27
開放時間︰8:00am-5:00pm（12月1日至3月31日 冬季休息）
交通︰JR「大步危」站轉往「剣山」方向巴士至「かずら橋」站下車
網址：三好市觀光局 miyoshicity-kankokyokai.or.jp
延伸閱讀：秋遊四國 小豆島 寒霞溪紅葉絕景
