撰文：Carmen
1｜「小熊維尼」並非生物
由於動畫裡有唔少維尼食蜂蜜嘅畫面，所以唔少人都認為維尼真係一隻熊。但其實，官方方面都話維尼係一隻毛公仔。因為身體係由棉花組成，所以食蜂蜜時，被蜜蜂針都唔會覺痛。
2｜「Winnie the Pooh」由來
「Winnie the Pooh」個名源於英國倫敦一個動物園內，一隻Winnipeg熊（Winnie）同天鵝（Pooh）嘅名稱合併而來。
3｜維尼嘅原形係⋯⋯
有說原作者A.A. Milne創作時，係以兒子 Christopher Robin Milne嘅熊仔公仔為原形，但有另一個說法係，負責畫插畫嘅E.H. Shepard參考嘅，係自己個仔嘅熊公仔「Growler」。
而喺故事裡出場嘅其他角色，大部分都係以Christopher擁有嘅毛公仔為原形創作。
4｜維尼點解討厭芝士？
相信無人不知維尼鍾意食蜂蜜，但你又知唔知點解維尼會討厭芝士？據說，維尼有喺所有食物上都淋上蜂蜜，令食物變甜嘅習慣。但只有芝士係點都無法變甜，所以維尼就唔食芝士喇！
5｜維尼摯友Christopher Robin嘅原形係⋯⋯
Christopher Robin係A.A. Milne安排於故事登場嘅其中一個角色。而角色嘅原形，就正是作者個仔Christopher Robin Milne。據說Christopher有喺真人版電影嘅opening同ending出場，但就冇影到個樣嘅。
6｜維尼有3個生日？
關於維尼嘅生日有3種說法。第一個係公式設定嘅1921年8月21日，呢日係將維尼作為禮物送畀Christopher嘅日子。第二個說法係原作《小熊維尼》初版發售日嘅1926年10月14日先係維尼嘅生日。而第三個說法話應該係迪士尼動畫劇場版上映日，先係維尼嘅生日。
7｜跳跳虎叫Tigger係因為串錯字？
維尼摯友之一嘅跳跳虎英文名為「Tigger」，據說係因為將「Tiger」嘅串法搞錯咗，加多咗一個「g」。據說係為咗表現出登場角色嘅年幼感，所以作品中除咗Tigger個名之外，都仲有唔少串錯字嘅情況。
8｜「伊唷」個名係點嚟？
《小熊維尼》主要角色之一嘅「伊唷」係以驢仔為原形嘅角色。而佢嘅名字由來都係嚟自驢仔嘅叫聲。據說英國中，驢仔嘅叫聲聽起嚟似「伊-唷-伊-唷」咁叫，所以就直接將呢個叫聲用作角色名稱。
9｜周邊產品銷量超越米奇
維尼嘅人氣同米奇不相上下，據說喺1990年代後半期，至2000年代前半期，維尼嘅產品銷量甚至比米奇更高。特別係2003年，將米奇、米妮、唐老鴨、高飛、布魯托等主要角色嘅產品銷量加埋，都唔夠維尼一個角色賣得好。
10｜維尼其實係女仔？！
維尼聲線較低，稍微帶有一種中年大叔感。而且英文版都係用男性用嘅「He」嚟稱呼佢，所以正常都認為維尼係雄性。但其實fans間流傳住一個「維尼可能係雌性」嘅講法，因為據聞作為維尼原形嘅公仔係雌性熊嚟，而維尼嘅本名，「Winnie the Pooh」中嘅Winnie係女性常用名。
雖然官方冇明確記載維尼其實係男定女，但呢個說法喺fans間都係非常有力嘅傳說。
11｜維尼同米奇唔可以共演？！
維尼同米奇都係迪士尼角色裡面超受歡迎嘅角色，但幾乎冇乜點見過呢2個角色同場出現。無論係周邊產品，定係巡遊都好，都唔會見到呢2個角色同場出現。咁係因為，迪士尼其實係冇維尼嘅使用權，維尼嘅使用權係屬於Stephen Slesinger Inc.。
據說，迪士尼需要支付Stephen Slesinger Inc.部分源於維尼嘅產品收益，但如果同其他角色共演，收益就會難以計算，所以避免同其他迪士尼角色同場。
12｜小豬本名唔係叫Piglet
維尼嘅好朋友中，最cute嘅相信就係小豬！但喺可愛嘅外表下，原來有個叫Henry Pootail嘅，都幾man嘅本名，但就從來冇聽過有人叫小豬呢個名。
13｜圖書館展出「原形」公仔？！
據說喺紐約公立圖書館有展出維尼原形嘅毛公仔。但有說此公仔已遺失。
14｜Christopher Robin曾受欺凌？！
據說因為《小熊維尼》爆紅，令現實中嘅Christopher Robin Milne喺學校頻頻被人糾纏，曾覺得童年被父親破壞咗。
15｜名字刻於荷里活星光大道！
「小熊維尼」個名被刻於荷里活星光大道。包括維尼在內，至今只有16個故事角色嘅名稱被刻喺星光大道。
