資料及相片來源：新傳媒資料庫、Tokyo Skytree官網照片
俯瞰東京巿夜景
東京地標「晴空塔」634 米高，聳立於平房滿佈嘅墨田區，榮獲 「世界一」最高電視塔新紀錄，難怪日日都咁多人想去朝朝聖啦！呢座高634米的電視塔，籌建初期原本名為「天空樹」，但因為註冊前發現漢字名稱已經喺中國內地被註冊，所以當初改名為「東京晴空塔」，但英文同日文名都保留原意採用「Tokyo Skytree 」、「東京スカイツソー」。
4 月櫻花盛放時，你趕唔趕到睇花海？
「晴空塔」下賞櫻花，一次過影晒！
「天望迴廊」 360度冇死角影景！
出發前幾日記住睇下天氣報告，揀正晴空萬里嘅日子啦！一般如果要睇朝早景，早上 8 點半就要出發，持票就可以登上 450 米高觀景台！行出升降機，雪白嘅玻璃走廊，基本上身邊都係不停地重複講「すごい（很厲害）」嘅日本人，因為 360 度一望無際，都係墨田區密集嘅民房，視野好有氣勢㗎！呢條叫做「天望迴廊」嘅高空走廊，原來係條微微往上傾斜嘅觀光隧道，所以，呢條繞塔頂1圈的「蛇餅」，隱藏咗最好玩嘅秘密─ ─因為頭尾係分開嘅，走到最高點451.2米嘅時候，啱啱好可以回望起步點嘅玻璃箱，同朋友揮手之餘，亦可以同一大片東京景點打個照面，場面非常壯觀！
分割成高低兩截嘅「天望迴廊」觀景台，造就出呢個絕佳嘅影相位，當大家由最高點影番落去，就可以同東京灣最長的隅田川及淺草一帶合照！
提提大家，如果要拍出大相的角度，最好朝早10點前就好到達，咁就唔怕背光啦。
走廊內部，就好似1個環形太空艙，沿住一路往上行，就到達最高點451.2米！
$200玩盡「晴空塔」 登頂攻略
除咗450米 玻璃隧道，真正聚滿人群嘅係位於 345 至 350 米、劃分成 3 大樓層嘅「天望Deck 」，呢度仲包括餐廳、紀念品店、全景電子屏幕等等，咁多樣設施好聰明咁分佈於上、中、下3層， 成功將遊客分流， 但又唔會覺得擠迫，落地玻璃行足 3 層，￥2,000/HK$190嘅入場收費，值回票價啦！
到咗 350 米「天望Deck 」之後，立即買票轉升降機去「天望迴廊」，因為每次只可以容納 900人，排隊時間越晏越長！
位於 350米的「東京時空Navi 」，由 3 個 52 吋大輕觸螢屏組成，顯示早、午、晚東京高空全景，篤一篤，即刻顯示到建築物同街道名。
每棟高空旅遊塔總會搵到「玻璃地台」呢項設施， 位於 340米 的「Glass Bottom 」面積夠大，由多片 2 米 × 3 米的強化玻璃組成，比起其他觀光塔「細細格」嘅設計更寬闊亦都更驚心，好適合一班畏高朋友踎在旁邊「與眾同驚」㗎！
「Glass Bottom 」嘅設計，容許更多訪客參與高空拍攝。
望住富士山歎番餐
「晴空塔」上有 3 間餐廳，當中推介位於 340米 的 Skytree Café，因為呢度價錢比位於 345 米的 Musashi Sky Restaurant 經濟得多，佢哋嘅午市套餐每位￥4,500/HK$320，而且需要提前半個月訂位；喺 café 食到飽一飽，每人才不過￥1,000/HK$100！！最緊要嘅係店嘅窗口對正西面，即係話富士山同東京鐵塔嘅方向， 坐喺窗邊位置完全食正靚景！雖然樓上 350米 都有價錢相近嘅 café，但嗰邊只有立食區，難怪呢度成為經常爆棚嘅歇腳熱點啦！
店內只有4張窗邊枱，入座前記得同店員講明要「window seat 」！輕輕鬆鬆，飽覽美景！
波子汽水味芭菲 ￥700/HK$70
芭菲上層係波子汽水味啫喱同雪糕，下層係新鮮士多啤梨果肉粟米片，味道比一般芭菲清爽。
「晴空塔」展望台
開放時間：8:00am-10:00pm（最遲入場時間為9:00pm）
網址：http://www.tokyo-skytree.jp
收費： 單一票（350米）成人￥3,000/HK$210，12歲以下小童￥1,500/HK$105、3歲或以下免費
組合票（350米+450米）成人￥4,000/HK$280，12歲以下小童￥2,000/HK$140、3歲或以下免費
備註：組合票只能在「晴空塔」快速售票櫃枱購買
Skytree Café
高度：350米及340米
營業時間：8:00am-9:45pm
Musashi Sky Restaurant
高度：345米
營業時間：11:00am-11:00pm
網址：http://restaurant.tokyo-skytree.jp
即刻想飛去日本睇靚景？快啲睇埋更多日本血拼優惠啦！即刻click：