相片來源：新傳媒資料庫
1. 旋轉展望台俯瞰袖珍版日本
入到 Legoland 第一眼一定留意到50米高地標Observation Tower，漆上紅、藍、黃、綠色嘅展望台繽紛搶眼，望落有少少似用Lego砌出嚟一樣。唔止外觀夠晒吸睛，展望台仲可以360°自轉，大家上到去搵個靚位坐低，就可以俯瞰樂園每個角落同埋全日本名勝，講緊嘅「全日本」係指展望台前面嗰片「Miniland」，用咗超過1,000萬粒Lego砌出日本各地名勝，像真度極高，如果想一眼睇晒或者拍攝全景就要上去展望台。
2. 潛入Lego海底世界
Submarine Adventure可以話係名古屋 Legoland 最令人驚喜嘅遊樂設施，首先要坐入去Yellow Submarine潛艇，之後慢慢潛入Lego打造嘅海底世界，喺度可以見到金字塔、藏寶箱、海神像等遺跡，又有Lego潛水員，最特別係呢個虛構嘅世界竟然有真鯊魚、魔鬼魚游來游去，感覺好有趣。旅程結束後，去埋出口處個迷你水族館，可以摸下不同嘅海洋生物。
3. 過山車全場最刺激
雖然 Legoland 主打合家歡遊戲，但都有速度型機動遊戲滿足下追求刺激嘅朋友。飛龍過山車「The Dragon」係樂園內尖叫指數最高嘅機動遊戲，唔好以為佢外形似足童話故事嘅卡通巨龍就好小兒科，全程大約1分鐘已經有2、3個尖叫位，小朋友太細都係稍移玉步到隔籬嘅迷你版「Dragon’s Apprentice」體驗下好喇！
4. 瘋狂集郵Lego人
去名古屋 Legoland 有件必做嘅事，就係搵班Lego人仔合照！園內總共有10,000隻Lego人，有真人扮嘅，亦有Lego公仔嘅，遍佈不同園區。識行識走嘅真人版Lego人任攬任影唔嬲，又會同大家互動，所以特別受歡迎，不過佢哋出沒時間地點不定，大家想知可以問定職員。
5. Lego薯條及精品
玩足成日總要醫肚，Lego造型薯條雖然食唔飽，但用嚟放上網呃like最好不過。另外當然唔少得選購精品，每個園區都有商店可以逛，想臨尾一次過掃貨可以去番正門入口旁邊嘅The Big Shop，基本上所有商品都有齊，咁就可以把握時間玩晒啲遊戲先。
去得名古屋旅行，點會剩係入 Legoland 朝聖就算，吃喝玩樂各方面都一定要盡興。日本貨品質有保證，性價比又高，shopping自然係日本旅行唔少得嘅活動。醒大家一個tip，用Visa信用卡喺日本多間電器舖、百貨公司，甚至outlets都有折扣優惠，大家不妨上Visa網頁或者直接到客服櫃枱查詢，當然最緊要係帶埋Visa信用卡旅行！
想知今期有咩日本食買玩優惠，可以click入：