【文化差異】近年唔少日本寺廟都開放做民宿設施，名為「宿坊」，本意為畀入住嘅參拜者一個清靜嘅環境禪修、體驗佛教徒嘅簡單樸實生活，但因為富有日本文化特色，喺外國人觀光客之間愈來愈高人氣。近日日本高野山一名僧侶對批評寺廟服務差嘅留言予以「F字頭」粗口回應！係咩事令佢咁嬲呢？
撰文：Carmen｜圖片來源：TBS NEWS
對寺廟「服務」嫌三嫌四
近年留宿高野山「宿坊」嘅外國人人數急增，但對寺廟嚟講，又係唔係一件好事呢？
事緣有留宿過和歌山縣，高野山一間「宿坊」嘅外國遊客，喺大型住宿預約網站對該「宿坊」留下負面評語，「宿坊」方面則嬲到用過激言語回應評價。
有外國人留宿者評價指「職員嘅態度好冷淡」，而「宿坊」方面則回應：「點解我哋必須表現得友好？你哋嚟呢度住，到底係為咗咩？」
亦有其他外國人留宿者話「朝早冇得沖涼」，「宿坊」就話：「喺日本，我哋唔係朝早沖涼，係喺結束一日工作嘅晚上先至沖涼。唔該稍微學習下。」
而最令「宿坊」僧侶「火遮眼」嘅，就係外國人觀光客對寺廟提供嘅「精進料理」持負評，話「基本都係素食，味道好不可思議」，然後僧侶徹底「著咗」！
「宿坊」僧侶發火大罵：「呢樣係日本嘅『精進料理』！冇啲教養！」留言更加帶有「F字頭」嘅粗口回應！
「爆粗」僧侶解釋
呢位嬲爆嘅僧侶原來係美國出生！10年前來到高野山出家成為僧侶。唔知係咪正正自己都係外國人，先更加對外國人嘅行為睇唔過眼呢？
僧侶木村Daniel話有啲留宿者會以為住寺廟係件豪華事，以為自己住緊酒店。
曾經有留宿者驚訝房間裡面點解唔係睡床，而係榻榻米。
亦有留宿者唔理解新鋪榻榻米嘅味道，話「有臭椰菜味」。
而且日本文化係要喺玄關脫鞋先可以行入室內，但唔少外國人觀光客因為文化同習慣唔同，經常著住鞋就想走入屋內。
雖然Daniel已經反省緊自己嘅行為係咪太激，但希望觀光客「以前來修行嘅目的入住『宿坊』係最重要嘅事」。大家記得去旅行前要預先做定功課，要入鄉隨俗，唔好以自己一套去破壞當地人嘅文化同生活習慣！特別係前往寺廟等神聖地方時，更要注意！
