【日本熱話】日本方面，天氣愈來愈凍，每日早晚溫差可達10度！呢個時節就係眾多「激辣」料理登場嘅時候喇！打頭陣嘅係香港人都唔陌生嘅「丸龜製麵」，今日（23日）起推出「100辛」激辣烏冬！落單前仲要事先簽同意書。日本Twitter上唔少網友都表示要去挑戰！唔知有幾辣呢？
撰文：Yu｜圖片來源：丸龜製麺【公式】Twitter
丸龜製麵推「100辛」激辣烏冬
丸龜製麵曾於10月9日推出「うま辛坦々うどん」（辛辣担担烏冬），今次嘅激辣烏冬會沿用呢個湯底，但辣度就提高咗唔少，所以連名都變埋做「うま辛辛辛辛辛担々うどん」（辛辣辣辣辣辣担担烏冬）。價格分一般大小650円（約HK$45）、大750円（約HK$52）、得850円（約HK$59）。
另一方面，辣度可由原味、1辛、2辛、3辛、4辛、5辛、10辛、20辛、50辛、100辛，分10個等級逐級加辣。怕一嚟就「打boss」嘅朋友，可以先試細級數啲嘅辣度，再慢慢加辣挑戰「100辛」！
注意事項共2點！第一點係，加辣嘅話，需要支付相關「追加料金」，1～5辛加30円（約HK$2）、10辛加100円（約HK$7）、20辛加200円（約HK$14）、50辛加500円（約HK$35）、100辛加1,000円（約HK$70）。
第二點則係，如果想直接挑戰50辛或100辛，喺落單前，要先於丸龜製麵官網攞電子票，並保存於手機內。據官方表示，喺店頭落單最多只可叫20辛，所以就咁去walk-in食，係食唔到㗎！