四國自駕遊2024丨10個必去打卡位景點、路線圖、環島行程攻略目錄
四國自駕遊2024丨Day 1+2：日本著名秘景勝地──德島
打卡位：鳴門漩渦＋靈山寺
由香港機場直飛3個幾小時，就嚟到位於四國東部嘅德島，由明石海峽大橋同大鳴門橋與本州相連，隱藏唔少意想不到嘅大自然秘景！當中不能不去就一定係世界三大漩渦之一嘅鳴門漩渦，漩渦直徑有成20公尺！因為快速嘅潮流同周圍流速較慢嘅海水接觸，產生成令人震懾無比嘅海水撞擊場面，坐埋觀光船從海上近距離觀賞，或者喺步道上親身感受嗰份漩渦震撼力，嚟個高角度自拍打卡係指定動作吧！
想進一步潔淨心靈，去埋距離至今已有1,200年歷史、以前修行者必到「 四國 遍路」中嘅靈山寺，佢更加係四國88處靈地嘅第1間名剎寺院，具有深厚歷史價值。
打卡位：祖谷溪（小便童）＋祖谷藤蔓橋＋大、小步危
德島中嘅祖谷藏有三個必去嘅動人秘景，當中必定要入住日本三大「秘湯」之稱嘅祖谷溫泉。由於地形獨特，處於170米深谷底之內，需要乘坐5分鐘專用纜車，先可到達呢個極為隱秘嘅露天溫泉，寫意地享受恬靜。
翌日出發到祖谷溪崖邊，就會發現呢個小僧居高崖上，趣怪可愛！
再步行溪谷內，呢條日本三大奇橋之一嘅祖谷藤蔓橋就展現於眼前，佢係國家重要民俗文物，由重達5噸嘅「軟棗獼猴桃」樹枝編結而成，一邊行過呢條搖搖晃晃嘅橋，透過縫隙望住底下溪流，挑戰膽量之餘，大自然嘅美景盡收眼底！
隨即去埋德島西邊嘅大步危同小步危，坐住觀光船欣賞壯觀懾人嘅峽谷溪流，仲會觀賞到蝙蝠岩及獅子岩等怪石，感受一趟超滿足溪流泛舟之旅！
四國自駕遊2024丨Day 3：水天一色融為一體──高知
打卡位： 坂本龍馬像＋桂濱＋四萬十川沉降橋
由德島自駕大約2個多小時去到高知縣，就到咗唔少人都聽過佢大名、日本嘅歷史英雄「坂本龍馬」出生地，率先去到高知市桂濱公園欣賞呢座朝向著太平洋嘅銅像，感受下威嚴宏偉嘅感覺。
沿著坂本龍馬銅像步行，就會去到面對太平洋壯觀海岸線嘅景色，跟著步道走，上到高處一間被稱為龍王宮嘅海津見神社，沿途松林滿處，一邊望住太平洋嘅海浪邊打卡，夠晒豁然開朗。
寫意漫遊完，就必定要親身見證呢條日本最後嘅清流──四萬十川，河水清澈見底，當中建構咗22座沉降橋，潮漲時會沉入水中，結構令人嘆為觀止。而且仲可以選擇去到中段流域嘅四萬十・川之驛獨木舟館划獨木舟，或者踏單車近距離欣賞水天一色嘅絕景，絕對係不能錯過嘅打卡位吧！
四國自駕遊2024丨Day 4：造訪3千年歷史《千與千尋》最古老溫泉──愛媛
打卡位：松山城＋道後溫泉
再由高知自駕2個多小時，去到被歷史文化包圍嘅愛媛縣，呢座矗立喺山丘上嘅松山城係必到景點。可以坐普通或者單人纜車，上去飽覽呢個史跡公園望到嘅石鎚山同伊予灘開揚景觀。
隨即可自駕到東北部、號稱日本最古老嘅道後溫泉，呢座具有3,000年歷史嘅三層木結構式建築，係第一個被指定為重要文物嘅公共浴場，更加係宮崎駿動畫《千與千尋》取材原形！記得去旅館朝聖一番，投宿作客，感受呢份溫泉之鄉昔日嘅文化氣息吧！
四國自駕遊2024丨Day 5：烏龍麵發源地──香川
打卡位：小豆島天使之路＋小豆島橄欖公園
隨後再自駕2個多小時去到東北邊、面對瀨戶內海嘅香川縣，直駛至瀨戶內海嘅小豆島，除咗出名釀製醬油、橄欖等，記得計準潮汐時間去一睹每天只會出現一或兩次嘅天使之路，當中因為潮退而出現嘅沙洲，成為唔少電影、日劇嘅拍攝地，點可以唔打卡留念呢～
小豆島上另一瘋狂吸引鏡頭嘅，仲有橄欖公園，有超過2,000棵橄欖樹，更係《魔女宅急便》真人電影版取景地，公園內風車裝置充滿希臘風格，橄欖樹同埋香草，襯托著海景，絕對係夢幻打卡點！
打卡位：金刀比羅宮＋栗林公園＋瀨戶大橋
要數市內充滿氣勢嘅打卡點，必定係西部位於海拔 521 米、象頭山山腰上嘅金刀比羅宮，全座神宮充滿唔少歷史痕跡，每年就吸引300萬人次到訪參拜，更加係日本人心目中「一生必去一次」嘅地方！
去到香川就必到日本最具歷史代表嘅大名庭園，就係具有400年歷史嘅文化遺產──栗林公園，園內由唔同形式嘅庭園建成，四季有唔同風貌，更加被評為日本國家級特別名勝，唔嚟打卡，必定會遺憾吧！
日本大橋建築素來甚有觀賞價值，呢條瀨戶大橋就由10座橋連接而成，由本州（岡山縣倉敷市）至香川縣坂出市，無論係遠觀定近距離仰望，一定會感受到呢條大橋嘅氣勢何等磅礡！
