賞楓穿搭目錄
賞楓穿搭｜1. 賞紅葉穿搭一定要著夠衫
賞紅葉最大謬誤，就係以為天氣唔會好凍，所以著唔夠衫，最終一係堅持少布最後感冒，一係著住老套羽絨影，又唔會有靚相呢！其實去年東京已在11月迎來54年最早初雪，所以天氣極凍，暖包記得一定要長期跟身！所以出發前，襯衫就一定要連厚褸一齊襯，又或者學習洋蔥式穿搭法，Heat-Tech + Fleece + 大褸，影相時把握黃金5分鐘，除厚褸換靚靚外套即影，咁就唔怕凍親又有靚相啦！
賞楓穿搭｜2. 玩大地色系絕對會出事！
不少人（尤其文青）襯衫都愛玩monotone，如果想影紅葉，就千祈唔好玩大地色系或紅色系的monotone，事關影相時會融入景色，毫無焦點！其實影紅葉，紅楓樹海背景已經好密集，所以身上的打扮一定要能突出自己，咁先可以搶鏡唔淪為配角。建議冷色系或黑白灰都是唔錯的選擇！
賞楓穿搭｜3. 樹下泥濘雪地 新鞋註定會污糟
去旅行，好多人買新鞋都會即刻著，但如果你準備去睇紅葉，就建議你等多兩日啦！事關紅葉樹下9成是泥地，記者試過陪model影15分鐘已經滿腳污泥，睇到對鞋都覺得傷心！尤其落雪過後，泥地變成泥濘雪地實在好難搞，所以絕對唔好挑戰著白鞋、新鞋、高踭鞋等等，反而防跣腳的山系boots先係首選！
賞楓穿搭｜4. 必備帽、耳環、頭飾等小配件
除咗影意境文青照，影大頭照亦是必須的吧！如果不是黑髮，就緊記要戴齊帽、耳環、頭飾等小配件，因為可以令相片構圖更豐富，影景深效果時會更出眾，model曾經冇戴任何飾物上陣，即變超圓大面，so sad！但記得唔好太貪心，飾物款式不宜太誇張，亦唔好太巨型，否則會搶fo，紅葉變配角就太可惜了！
賞楓穿搭｜5. 和服？千祈唔好試！
每當遇上櫻花、紅葉、銀杏等景色，不少人都會聯想到要著住和服影。講真，影出嚟真係靚，但過程一定令你好難忘！記者試過帶model著和服影，每時每刻都要擔心整污糟要賠錢，執紅葉又唔方便（千祈唔好摘樹上的葉，會被人鬧），最後model都頂唔順話：「一次就夠！」所以，如果你有超強忍耐力，當然要試試；但容易嬲嬲豬的話，就千祈唔好試喇！黑住面影相又點會好睇呢？
