3＋4隔離措施8.12起實行 4天家居檢疫可外出上班
港人期待的放寬隔離措施終於在今天（8月8日）出爐，港府表示，由8月12日（星期五）起，抵港人士隔離期由原定7日改為3＋4隔離措施。
- 由8月12日起從海外或台灣抵港人士只需在酒店檢疫3天，其餘4天則可家居監察。
- 家居監察期間，檢疫人士可以如常外出，惟不可除口罩及進入疫苗通行證有主動審核的表列處所，包括食肆、酒吧、健身中心、美容院、派對房等，而學校、安老院、指定醫務所亦不可進入。
- 在每天快測陰性下，4天監察期間可如常乘搭交通工具上班及進入商場及街市等。
網民對3＋4隔離措施反應兩極：4日可以出街仲叫監測？
至於7日酒店隔離變成「3＋ 4」，已預約隔離酒店的人士於第三日陰性後可離開兼獲退餘下房錢。有網民樂見消息，指會落實安排旅行，不過亦有網民指「無分別」，更指「4日監察其實係為咗畀人返工，咁點解唔直接改成3日算？無分別」、「隔離酒店縮到3日，要賺錢仲唔大幅加價？條數咪又係喺返到」、「可以出街但唔可以出街食嘢，但之前又話戴口罩經過都傳染，真係令人好不解」。
袁振寧：唔擔心酒店突加價 反而某些旅行社的手續費安排要小心
對於網民最關心的酒店會否藉此加價問題，袁振寧指機會極微，反而應留意某些會收手續費的旅行社會否提高手續費的比例。他指「因為酒店要申請做檢疫酒店嘅時候一定係有定咗價先，可以話已經係『公價』，好難突然之間話要加就加，而且縮短咗日子代表房間又會多返出嚟，所以供求正常可都唔會突然加價。」
不過值得留意的是，袁生特別提到有些旅行社會代客訂酒店時收取手續費，旅客反而應留意一下。「以我所知，香港有啲旅行社訂檢疫酒店時會收取一定%的手續費，明明$1,000晚可能收你$2,000，佢哋會唔會趁呢個時候提高手續費嘅價格就好難講。」
樂見放寬隔離措施 惟旅遊業要復甦仍需一段時間
對於新措施，袁指樂見這個消息，惟對於香港旅遊業回復光景而言尚有漫長日子，與網民意見相約。「聽到呢個消息當然係好事，而且比想像中多，之前仲諗住係『4＋3』或者『5＋2』，旅客照常嚟講點都會多咗，單以7月去日本的人而言大約200人，新措施下估計會有多幾倍。」雖然人數或會增長，但袁指情況只是疫情前的0.5%，「疫情前單係一個月都20萬人日本旅行，加上現時航班未回復正常數量，難以有即時反應。雖然HKExpress現時頻加開班次，但由於其他航空公司未必能在短時間內重新安排部署，因而旅遊業依然處於低位。」
他更指現時出發到日本旅行的不單是50-60歲或退休人士，「最細嘅18歲，最大年紀嘅大約70歲，其實見到好多人真係等咗好耐去旅行，想信大家旅行慾望很大，但都要等再度放寬和航空公司的配合，旅遊業才有好消息。」
