香港打工仔出名工時超長，每周工作 50.1小時，平均比印度外賣仔還要多7個 鐘！若然生在北歐，打工命運就更加截然不同──北歐人每周工作30小時、月薪3萬5港紙；你睇梗呢篇報道時，佢哋已經計劃梗長達一個月的暑假，逃離市中心、搬去海濱度假屋盡攬陽光！係咪覺得投錯胎？為了探索一下北歐 「 風流工 」有幾輕鬆， 黃翠如 早前就「 復出 」 拍旅遊節目，去了芬蘭、瑞典兩星期，體驗愉快「 外勞 」生活！
終於唔使拍劇！
原來黃翠如轉去大台後完全未試過主持個人旅遊節目，對上一次已經係6 年前在 NowTV的旅遊節目《Lifetival》！今次出動黃翠如，幕後拍攝是《走過浮華大地》的團隊，距離上次同Tony合作的《走過足球聖地》又已經有兩年前的事了。
任務＃01 樹屋打雜 好睇唔好住
Working Holiday最入門級工種，當然就係旅館打工，低技術、易搵食，仲可以賺埋住宿！瑞典夏天無冰酒店，但就有長年開放的百年樹齡森林樹屋：「Harads係只有 6 個房的酒店，好多旅遊節目同雜誌都有介紹，拍出嚟好靚，但真正幫手執房就完全係另一回事!」爬梯孭床單好小兒科，原來仲要執屎！幸好樹屋上面設有高科技環保廁所，大便清理前已是經過焚化，好「乾爽」仲可以欣賞到唔同形狀！
雖然設計獨特，有 UFO 又有玻璃房，但打掃絕對唔輕鬆。
房客可放低行李土篋在大堂,換個背囊上樹投宿,翠如就要孭住數十磅的床單毛巾爬梯,無得偷懶……
旅館主人表示酒店共有 6個職員，負責除草、劈柴以及維護樹屋。
除了圓形的UFO房，最奇幻的應該是玻璃房，反映四周的森林，好似隱身叢林入面一樣！