依家啲 智能喼 ，個個身懷絕技，不過部分功能唔係咁實際，對我來講最實用其實好簡單 – 慳位！作為一個旅遊記者，全屋大大話話都有三、四個喼 ，其實都幾佔空間。有咗以下兩款多功能高科技行李，收喺床底、躲於衣櫃、攝喺門後都咁輕易啦！
01 | 摺到真細小Barracuda
呢隻軟喼 ，可以好似摺衫咁容易，十秒可以摺得埋，9吋厚摺成4吋，起碼細成倍，最啱我呢亭蝸居人士。細小但強壯，用上彈道尼道、航空級鋁合金及Makrolon聚碳酸酯製作，但又暗藏一張可以調校高低的摺枱，用來放手提電腦、食物飲品，好有《國產凌凌漆》feel，係型嘅！
另外一大賣點係360度人體工學圓形手柄，可以隨手腕轉動，拖得舒適，給我瀟瀟灑灑的上機！現代 智能喼 必備的藍芽（須另購）、可拆式充電器當然唔少得。仲有五隻色可選，最可惜係只得一個22吋carry-on size，現時香港代理SearchingC賣緊$2,399，合理喎！（圖片來源：barracuda.co）
02 | 一喼兩sizes Fugu
有冇試過飛四至五日，心大心細決定唔到用大喼定細喼？呢款 智能喼 就可以解決我的選擇困難症，因為一喼兩用，一個硬喼兩種sizes！Carry-on size就正常打開，如果想變成寄艙size，就可以利用內置電泵充氣兩分鐘，好似變魔術咁即時變大變大，自動伸展多3倍空間，容量由33L漸變115L，仲有格層可以化身成一個櫃，輕輕鬆鬆收納。喼只重4.5公斤，ABS物料防水防撞，唔怕喼張開後特別易爛，喼面仲可以變成枱面甚至櫈仔。現時官網賣緊US$299/HK$2,320，暫未有貨。有咗呢條雞泡魚，就可以一喼走天涯啦！（圖片來源：fuguluggage.com）
