不過, 食嘢除咗食味道之外，仲要食態度! 我以為去馬爾代夫住水上屋人生已經係無憾喇, 原來去埋酒店嘅水底餐廳食野先至叫完美! 除咗耳熟能詳嘅Conrad 坐擁第一代水底餐廳之外, 嚟緊7月同11月又會開多2間新酒店, 後者仲號稱係擁有全球最大嘅水底餐廳! 即刻同你地細數5間馬爾代夫水底餐廳 , 睇吓你識幾多間!
01 | 今年11月出嚟見你! Hurawalhi Island Resort
「18禁度假酒店」將坐擁全球最大海底餐廳 “5 8”！取其坐落於5.8米深之意。餐廳長18米、闊5米，可容納24人用餐。全玻璃圓頂、窗同天花設計仲可以360度睇住真．魚樂無窮送飯! 到時話俾人聽你住馬爾代夫最新酒店都未係最曬, 喺全球最大海底餐廳食野+食view先係最威威!
位置: Lhaviyani Atoll
交通: 由馬里機場出發40 分鐘水上飛機
包啲咩: 來回機票+ 3晚住宿、交通接送、天天早餐
對象: 結婚週年/蜜月
02 | 第一代架勢堂! Conrad Rangali Island
第一間海底餐廳⋯⋯哎呀⋯成日噏到口唇邊架喇, 原來係Conrad酒店入面個間呀! 既有國際名牌加持，又係元祖級別，成個package已經上曬神檯，要豪歎真係非佢莫屬！Ithaa 全玻璃幕牆海底餐廳建於2005年，走入3米深被自家珊瑚群圍繞食set， 當時嚟講真係史無前例咁濟!
Conrad 集團嘅酒店出名空間感夠大, 呢間更厲害嘅係, 佢唔止一島一 Resort，而係由兩個島組成，兩島之間有長500米嘅木橋連接，靠馬代傳統Dhoni船接駁, 勁有feel! 而家試曬2種住宿﹕Deluxe Beach Villa 傳統小木屋直接行去沙灘 + Water Villa 水上屋連私人泳池, 牌面贏曬!
Beach Villa
Water Villa (日落景)
位置： South Ari Atoll
交通：由馬里機場出發25 分鐘水上飛機 或 20分鐘內陸機 + 30分鐘快艇
包啲咩： 來回機票+ 4晚住宿、交通接送、天天早+晚餐
對象： 結婚週年/蜜月 / 家庭旅行
03 | 奢華到一個點! Anantara Kihavah Villas
酒店於2011年開幕, 特別之處就係除咗水底餐廳外, 仲有水底酒窖、水底Spa同水底婚禮… 硬係要比人地多先夠勁! 唔止呀﹐餐廳裝修都好浮誇架﹐昏暗燈光加bling bling 鏡面天花﹐迷得嚟係幾浪漫嘅。最好笑嘅係﹐佢地仲有本魚類catalogue 俾你對照番出面游緊個啲魚係邊條打邊條, 一啲都唔馬虎架!
至於房間look and feel, 都係貫徹馬代度假酒店裝潢, 以傳統海島風作招徠: 暖色系家私同大理石地板。 其中Over Water Pool Villa真正禾稈冚珍珠, I mean 喺外面睇, 屋頂真係舖滿禾稈草, 入到去直情奢華到一個點！有專屬泳池、甲板上有搖床Day Bed、凌空網繩吊床… 夠未? 唔夠囉﹐加埋個玻璃底望海浴缸先滿足！
位置: Baa Atoll
交通: 由馬里機場出發35分鐘水上飛機 或 20分鐘內陸機 + 20分鐘快艇
包啲咩: 來回機票+ 4晚住宿、交通接送、天天早餐
對象: 海外婚禮/蜜月/結婚週年/ 家庭旅行
04 | 2016 年7月面世! Ozen by Atmosphere
酒店入面嘅Minus 6 Meters 係首間唔洗額外俾錢嘅水底餐廳！你知喇, 就算俾錢買咗all inclusive plan﹐都唔包喺水底餐廳度食架嘛。但係呢間破天荒包埋喺個plan度, 4晚住宿可以喺入面歎一次早/午/晚餐, 好抵! 題外話: 全包計劃仲有1次出島遊、出海釣魚、Kid’s club、浮潛用品同非引擎水上活動。去馬代仲就住就住洗好冇癮姐, 一價包曬唔洗out- budget!
酒店主打「家的感覺」﹐別墅嘅核心內圍均採用高樓底設計及沿用木製裝潢同和諧色調﹐真係堪稱酒店界嘅暖男！如果住Earth Villas with Pool﹐核心外圍仲附加園林綠野景致同8米長私家泳池﹐可以望住潟湖同日落游水！ 大棚人出發可以住OZEN Water Suite因為有3間房連浴室、私人健身室、廚房用具同360度靚景！
位置: South Mahe Atoll
交通: : 由馬里機場出發35分鐘快艇
包啲咩: 來回機票+ 4晚住宿、交通接送及全包計劃
對象: 家庭旅行/蜜月/結婚週年
05 | 由朝玩到晚! Per Aquum Niyama Maldives
呢間全球第一間海底酒吧 Subsix只可以用10個字形容, 「巴閉」！威水史就係曾邀請到攝影大師舉辦水底藝展，將珊瑚礁群變身童話世界！佢表面上係一間餐廳同酒吧﹐實際上仲係水底會所同night club ( 嗱, 咪諗錯隔離﹐唔係邪野~) ！住客乘坐快艇過嚟，再往水底行三層樓梯，就見到入面華麗嘅貝殼燈飾、珊瑚狀吊燈同海膽型嘅櫈~ 活動由朝到排到晚，包括香檳早餐、試酒會、婚禮及主題DJ party等！
更值得一提嘅係佢分咗兩個島﹕一個專俾情侶2人世界﹐一個俾家庭入住。其次就係別樹一格嘅房間。時尚純白別墅同傳統馬代房間截然不同：有人鍾意鮑參翅肚﹐有人鍾意清淡無味﹐簡潔design同無限空間感應該會勁吸一班愛好less is more嘅年輕情侶！好似Deluxe Water Studio 咁 ﹐房外嘅無障礙露台就有2個大泳池, 仲係面海嘅o添﹐好似無限伸展一樣呀！
位置: South Western Atoll of Dhaalu
交通: : 由馬里機場出發40分鐘水上飛機
包啲咩: 來回機票+ 4晚住宿、交通接送及、天天早餐
對象: 家庭旅行/蜜月/結婚週年
睇曬以上酒店套票﹕http://goo.gl/4WL34D
** 題外話, Per Aquum 集團旗下喺馬爾代夫仲有間Huvafen Fushi 亦有水底Spa ﹐有海底慢游嘅魚仔陪住做Spa感覺比平時更放鬆呀！
